Remzîye Karadaga ke Zîndanê Tîpa Tyî yê Xarpêtî de manena bi sebebo ke vera tecrîdî kewta grevê vêşanîye nêna dermankerdene
Remzîye Karadaga ke Zîndanê Tîpa Tyî yê Xarpêtî de 76 rojî grevê vêşanîye de mende sey xeylî xoverdayoxanê bînan a zî nêna dermankerdene.
Karadage serra 2014î de Zîndanê Mêrdînî ra dimayê 2 serran serbest ameye veradayene û mengêk ra dima reyna ameye tepiştene û erşawîyaye Zîndanê qezaya Gurnê Reşî ya Riha. Serrêk ra dima Xarpêt ra ameye surgunkerdene. Dekewtişê zîndanî de raştê cigêrayîşê rutî ameye û vera naye vejîyaye, qebûl nêkerd. Nê semedî ra ci rê îşkence ame kerdene û cezaya hucre dîyaye ci. Karadaga ke 6ê Teşrîna Verêne de tehlîyeya xo pawena yewna dosya ra ci rê 2 serrî ceza ameye birnayene.
Karadage 1ê çele de tewrê çalakîya grevê vêşanîye ya ke semedê wedartişê tecrîdê serê Rayberê Şarê Kurdî Abdullah Ocalanî hetê tepişteyanê PKK û PAJKî ra ameye destpêkerdene, bîye. Grevê vêşanîye 26ê gulane de bi vengdayîşê Ocalanî qedîyayî. Karadage û hîrê embazê ci ke pîya manenê heta nika teyna rayêk ameyî berdene bi nêweşxane.
Waya Remzîye Karadage, Zekîye Karadage ard ziwan ke gama ke waya aye û embazê ci hetê cendirmeyan ra ameyî berdene bi nêweşxane înan rê heqeret ameyo kerdene, nêngî ameyî çînayene û va: “Rîng de înan ra ameyo vatene ke înan rê tedawî çîn a. Xora dima ra cade peyser ameyî berdene bi zindan. Ma zî muracatê ÎHD û çend sazîyan kerd, la hema çîyêk nêame kerdene. Waya mi 16 kîlo dayî, rewşa ci xirab a û nêna dermankerdene. Îdareyê zîndanî vano ‘Şima çalakîye viraşte ganî netîceyê ci zî biancê.’ Reyna rîyê grevî ra 4 mengî cezaya qedexeyê pêvînayîş û qiseykerdişê telefonî dîyaya waya mi.” AMED
