Endamê Konseya Rayberdişî ya KCKyî Mustafa Karasuyî bernameyê taybetî yê Medya Haberî de rojdem ercna.
Qiseykerdişê Karasuyî ra tay noqtayê girîngî wina yê:
”Rayber Apo 25 serrî yo binê tecrîdêkê giranî de yo. Dewleta tirke pê tecrîdê Rayber Apoyî şarê kurdî ra qesasê xo gêna. Çunke Rayber Apo şarê kurdî rêxistin û zanaye keno. Coka dewleta tirke pê tecrîdê Îmraliyî şerêkê taybetî ana ca. Rayber Apoyî tim raştîya dewleta tirke fam kerde û vera ney sîyasetêko aktîf kerd. Rayber Apoyî vera hişmendîya dewlete ya qirkere têkoşîn kerd û no têkoşîn musna kurdan. Coka dewleta tirke o kerd hedef. Heta ke têkoşînê Rayber Apoyî nêro famkerdene serkewtişêko raştikên nêno destvistene.
Ez embaze Leyla Sorxwîne bi rêz û minetî yad kena. A serkêşanê Hemleya 1ê Hezîrane ra yew bîye û qehremanêka Botanî bîye. Ganî şarê kurdî şehîdanê sey embaze Leyla bişinasno û xeta înan de şoro.
Rayber Apo 1999 de bi komployî tepişîya. Dima ma 1ê tebaxa 1999î de adirbirnayîş îlan kerd û 5-6 serrî çalakîye nêkerde. La dewleta tirke nê prosesî de zî hêrişê ma kerd. O çax dewleta tirke vat qey seba ke Rayber Apo destê ci de ya têgêrayîşê ma zî tasfîye bîyo. Zereyê têgêrayîşî de zî heyf ke yew xeta tasfîyekere vejîyaye werte. Ma o çax seba ke meseleya kurdan çareser biba adirbirnayîş îlan kerd. Xora 2003 de zî AKP bi îqtîdar. La AKPyî zî seba çareserîya meseleya kurdan çîyêk nêkerd. Îşte ma 1ê hezîrana 2004î de vera xeta tasfîyekere û hêrişan hemleyêka newîye daye destpêkerdene. Dewleta tirke, tasfîyekeran û tay kesan vatêne ke PKK hînî do nêeşko têkoşîn bikero. Eke ma Hemleya 1ê Hezîrane nêdayêne destpêkerdene nika rew ra dewleta tirke Herêma Kurdîstanî ya Başûrî çin kerdêne û pêro destkewteyê kurdan çin kerdêne. Hemleya 1ê Hezîrane reyde ma xeta tasfîyekere tasfîye kerde. Ma vera hêrişanê dewleta tirke zî prosesêkê şerî yo newe da destpêkerdene.
Tirkîya de weçînayîşî demokratîk nîyê. AKP-MHPyî 8 serran vera kurdan şer kerd. Ê demokrasî nêwazenê; çunke vanê ke eke demokrasî bêra kurdî do heqanê xo bigêrê. Yanî dişmenîya kurdan kenê. Weçînayîşê 14ê gulane û 28ê gulane ne demokratîk ne meşrû ne zî edîl bîyî. Kam ke netîceyanê nê weçînayîşan sey netîceyanê weçînayîşêkê normalî biercno do xizmetê şerê taybetî bikero.
HDP mîyanê îtîfaqêkî de kewt weçînayîşan ke na birêka raşte bîya. Xora HDP prosesê weçînayîşan de raştê zaf teda, hêriş û operasyonan ame. Wexto ke HDP bêro rexnekerdene ganî no çî bêro dîyene. Nêbo rexneyî do neheq bibê. Seke ma vat HDP mîyanê Îtîfaqê Kede û Azadîye de bi nameyê Partîya Çep a Keske kewt weçînayîşî. Prosesê weçînayîşî de TÎPî bi sereyê xo tay cayan de wekîlî vetî. Xora ma no rexne kerd. La ganî rexneyê serê ney îtîfaqî vila nêkerê. Serê HDPyî û serê Îtîfaqê Kede û Azadîye ra tay polîtîkayê şerê taybetî yenê kerdene. Ganî her kes tedaya vera HDPyî bivîno û rexneyê ercanî nêkero. Ganî HDP û Partîya Çep a Keske binê tesîrê tedayan de nêmanê û rexneyanê xo bi na teda nêdê. Îtîfaqê Kede û Azadîye rixmê her çîyî zî weçînayîşan de serkewte bi. Kêmasî û xeletîyê înan est ê û ma pê bawer ê ke ê do nînan ser o rexneyanê xo bidê.
Weçînayîşê 28ê gulane de kurdan reyna tewirê xo mojna û bi zelalî vat ke ê Erdoganî nêwazenê. Kurdan seba ke Kiliçdaroglu bibo serekkomar raye nêdaye seba ke Erdogan nêbo serekkomar raye daye. Çunke kurdî demokrasî wazenê. Kurdan 28ê gulane de kerd ke verê faşîzmî bigêrê. Eke demokrasî bêra Tirkîya do tewirê kurdan ra bêra.
Xora têkoşînê vera faşîzmî teyna pê têkoşînê weçînayîşî sînordar nîyo. A raşte AKPyî weçînayîşan de hedefê xo nêvistî destî. La ganî ma bizanê ke ma teyna pê weçînayîşan nêeşkenê armancanê xo bîyarê ca. Çîyo girîng no yo ke dîktator wa pê weçînayîşan şoro. Ge ge zî dîktatorî netîceya şorişan û têgêrayîşanê şarî de bin kewenê. Peynîya Erdoganî zî do wina biba. Dinya de dîktatorî senî bin kewtê Erdogan zî do wina bin bikewo û şoro. Erdogan nika do hîna qels bibo coka hîna zaf hêrişê kurdan zî bikero. Kurdî ganî vera nînan mîyanê têkoşînî de bibê.
Şarê ma raştîya HUDA-PARî hol zaneno. Hîzbullah û JÎTEM hetê dewleta tirke ra seba qetilkerdişê kurdan ameybî wezîfedarkerdene. Dewleta tirke HUDA PAR-Hîzbullah senî şuxilnayo PDKyî zî wina şuxilnena. Xora Hîzbullah zî nika tewr zaf AKP û PDKyî de têkilîye virazeno. Wezîrê Kayanê Zereyî Suleyman Soyluyî bi fekê xo vatbi ke HUDA-PAR do zaf faydeyê înan bikero. Dewlete kena ke pê destê PDK û Hîzbullahî PKKyî tasfîye bikera. La dewlete do qetî pê PKKyî nêeşka.
Ez xoverdayîşê şarê Mexmûrî selam kena. Artêşa Iraqî pê destekê Tirkîya û PDKyî hêrişê Mexmûrî kena. Ma venga dewleta Iraqî danê ke wa na polîtîka ra fek vera bida. Yew zerarê Mexmûrî înan rê çin o. Mexmûrî têkoşînê vera DAIŞî de zî bedelê pîlî dayî. Ganî pêro kurdî wayîrê Mexmûrî vejîyê û vera PDKyî tewirê xo bimojnê.” BEHDÎNAN
