Endame Konseya Rayberdişî ya KCKyî Mustafa Karasu tewrê Bernameyê Taybetî yê Medya Haber TVyî bi û rojdem ercna.
Qiseykerdişê Karasuyî ra beşêk wina yo:
”Vera Rayber Apoyî 24 serrî yo polîtîkaya tecrîdî yena kerdene. Cayêkê bînî yê dinya de sey Tirkîya çewî hende cezayê dîsîplînî nêdayê tepişteyêkî. Cezayê vera Rayber Apoyî çarçewa şerê taybetî de yê û nê esasî ser o nêverdenê o avûkatanê xo bivîno. Merkezê têkoşînê şarê kurdî û dewleta tirke Îmraliyî yo. Sîstemê îşkenceyî yê Îmraliyî zaf îfşa bîyo. Cezaya dîsîplînî î polîtîkayê tecrîdî mojnenê ke têkoşînê dewleta tirke çend bêbinge, qels, bêhez o. Mîyanê nê 24 serran de Rayber Apo pê xoverdayîşê xo tim xurtêr û hîna bitesîr bi, fikrê Rayber Apoyî pêro dinya ra vila bîyî. Polîtîkaya tecrîdî 24 serran de ser nêkewte, nika ra pey zî do ser nêkewa.
Nika Zap, Metîna û Avaşîn de xoverdayîşêko fedayî est o. Nê xoverdayîşî mojna ke şarê kurdî eşkeno dewleta tirke çin bikero. Şarê kurdî dî ke eke îxanet û ajanî ra nêbo, eke kurdî bibê yew dewleta tirke nêeşkena gamêke zî bierza. Gerîlayan hêzê şarê kurdî mojna pêro dinya. Dewleta tirke par Garê, Metîna û Avaşîn de armanc kerd ke ser bikewa la bin kewte û xo apey girewt. Nika zî na artêşa diyîne ya tewr pîle ya NATOyî vera hêrişan kena la nêeşkena netîceyêke bivisna destî. Ma rê sereberzî yê ke embazê ma yê winasênî est ê. Embazanê ma mojna ke no têgêrayîş û şar do qetî bin nêkewê. Dişmen her roje derban weno. Ma pê bawer ê ke cinîyî, ciwanî û pêro şarê ma layîqê nê têkoşînî bibê, têkoşînî xurtêr bikerê û ser bivisnê.
Derheqê şerî de destê ma de zaf dîmenî est ê la ma nêeşkenê biweşanê. Hetêkî ra şer est o, hetêkê bînî de zî ablûqaya PDKyî est a. Embazê ma her hela şerî qeyd kenê. Gerîlayî hê singe singe şeer kenê. Vera Kurdistanî hende zaf bombayî şuxilîyenê ke nê bombayî wextê şerê Vîetnamî de zî nêşuxilîyayî. Teknîkî ra nêbo dewleta tirke nêeşkena vera ma şer bikera.
Kombîyayîşê NATOyî de verê çimanê pêro dinya de kurdan ser o bazarîye ameye kerdene. NATO vera PKK, YPG-YPJ, PYD biran gêno. Nê hêzan vera DAIŞî şer kerd, tewr tay 10 hezar şehîdî dayî. Swêd û Fînlandîya cara çekî nêdayêne şexsê HSDyî. Înan seba têkoşînê vera DAIŞî çekî dayêne. Peymana Lozanî ewro bi hawayêkê cîyayî yena caardene. Ê destê xo nêdanê PDKyî la vera ê bînan her hawayî qirkerdişî kenê. NATO, Ewropa û welatê bînî pê têkilîyanê PDKyî wina mojnenê ke mabênê înan ê kurdan hol o. Kombîyayîşê Madridî de eşkera bi ke Ewropa çita ya, NATO çita yo, hişmendîya înan çita ya. Nika ê paştî danê dîktatorêkî (Erdogan.) Têkilîya înan lêşin a. Swêdî û Fînlandîya tay waştişanê Tirkîya rê vat ‘he.’ Çîyê ke dewleta tirke ferz kena,, têna Fînlandîya û Swêdî de nê pêro welatanê Ewropa de benê sebebê krîzî. Yanî Erdogan Almanya û Fransa rê zî vano ke ‘wina bikerê.’ Eke ê sey vateyê Erdoganî bikerê, do birijîyê.”
