Endamê Konseya Rayberdişî ya KCKyî Mustafa Karasuyî cewab da persanê ANFyî û weçînayîşan ra dima rewşa HDPyî, nîqaşê serê HDPyî û prosesê rexnekerdiş-rexnedayîşî ercnayî.
Qiseykerdişê Karasuyî ra tay noqtayê girîngî wina yê:
”HDP rîskê qefilnayîşî ra binê sîwana Partîya Çep a Keske de kewt weçînayîşan. HDPyî armanc kerdbi ke mîqtarê rayanê xo yê 2015î nê weçînayîşan de zêdeyêr bikero. La wina nêbi. Nê hetî ra HDP serkewte nêbi. Xora kêmasî û xeletîyê HDPyî est ê la hetê bînî ra HDP hende zî partîyêka qelse nîyo. Seba ke pratîk de kêmasîyê ci est bîyê HDP nêeşka armancanê xo bîyaro ca. Seba ke HDP warê rêxistinîye û çalakîye de qels mend nê netîceyî vejîyayî werte. Nika terefgîrê AKP-MHP, MÎT û PDKyî bi giranî hêrişê xeta îdeolojî, felsefe û sîyasî ya HDPyî kenê. HDP nêeşkeno bi cewabanê xo nê hêrişan berteref bikero. No zî mojneno ke HDP de kêmasîya perwerdeyî zî est a.
HDP serranê peyênan de vurîya bi partîyêka sîyasî ya klasîke. No zî sebebanê netîceyanê ci yê weçînayîşan ra yew o. HDPyî ganî teyna Meclîs de têkoşîn nêkerdêne. Fikrîyatê HDPyî de demokrasîya radîkale est a. Coka ganî HDP komelî bingeyî ra hîna zaf rêxistin bikero.
Ma nêeşkenê bi rayîrê matematîkî yanî bi hûmaritişê rayan qelsîya HDPyî biercnê. Çunke şarê ma yê kurdî rixmê hêriş û tedayan zî sindoqan de îradeyê xo mojna û vera AKP-MHPyî tewir girewt. HDP zî hedefê hêrişan û tedayanê tewr giranan de yo. Coka raşt nîyo ke seke HDP binkewto bêro mojnayene. Eke wina yew çi est o, uca de nêto xirab zî est o. Xora rexnekerdiş, rexnedayîşî ganî bêrê kerdene la nê ganî hêzî bidê, qels nêkerê. Di reyî şaredarîyanê kurdan rê qeyûmî ameyî tayînkerdene. Ney zî şar de sindoqan ser o bêbawerîye viraşte.
Nika medyaya dîjîtale de û tay kanalanê televîzyonî de vera HDPyî rexneyî yenê kerdene. Nê rexneyî seba ke HDP kêmasîyanê xo raşt bikero nênê kerdene. Nê rexneyî seba qelskerdişê HDPyî û têgêrayîşê azadîye yenê kerdene û nê rexneyî a raşte hêrişê vra têgêrayîşê azadîye yê. Fikrîyatê HDPyî de neteweya demokratîke, konfederalîzmo demokratîk est, demokratîkkerdişê Tirkîya est ê. Çew nêeşkeno nê fikrîyatî ra bêxeber HDPyî rexne bikero. HDP teyna partîya kurdan ney partîya cinî, ciwan, hêzanê demokrasî-şorişgêr û bindestan a. Coka HDP ganî teyna sey partîyêka kurdan nêro ercnayene û naye ser o nêro rexnekerdene. Polîtîkaya verêne ya HDPyî zî bi demokrasî çareserkerdişê meseleya kurdan o. Qiseyê ‘Demokratîkbîyayîşê Tirkîya ma eleqedar nêkeno’ demagojî yo, betal o. Meseleya kurdan pê demokratîkbîyayîşê Tirkîya çareser bena û HDP zî nê warî de erkê xo ano ca.
Seba ke HDPyî weçînayîşanê serekkomarîye de namzedê/a xo nêmojnayo/ya û paştî daya namzedê Îtîfaqê Miletî Rayîro Hîrêyîn nêteriknayo. HDPyî seba ke Erdogan ser nêkewo paştî daye Kemal Kiliçdarogluyî. Eke HDPyî turê verênî yê weçînayîşan de namzedê/a xo bivetêne înanê ke waştêne AKP-MHP şoro vatêne ‘AKP-MHP rîyê şima ra nêşîyo.’ HDP yan zî Partîya Çep a Keske eke bibê teyna partîya kurdan û demokrasî û şaran rê xîtab nêkerê o çax ancax Rayîrê Hîrêyînî terk kenê.
Vera HDPyî şerêko taybet yeno kerdene û di hetê nê şerî est ê; hetêkî vano ‘HDP çira beno tirkîyayîj, wa abigêro verî’, heto bîn zî vano ‘HDP sey partîya herêmîye mendo, nêbîyo tirkîyayîj.’ Hacetê şerê taybetî yê dewlete û terefgîrê PDKyî wina propaganda kenê ke HDP kurdayetîye ra dûr a û goş nêdano waştişanê kurdan. Nê kesî teyna wazenê HDPyî qels bikerê, yew eleqeyê înan bi samîmîyetî çin o. HDP seba azadîya kurdan têkoşîn keno. Kesê ke eqsê ci vanê propagandaya reşe kenê. HDP partîya kurdan a zî la teyna partîya kurdan nîya; partîyêka neteweperwere nîya. Eke HDP wina têbigêro kurdî do bin bikewê. Hêzê şerê taybetî yê dewlete, hemkarê PDKyî pîya kenê ke HDPyî qels bikerê û kurdan bin bivisnê.
Reyna qiseyê ‘Îtîfaqê bi hêzanê demokrasî yê Tirkîya HDP bin vist’ zî qiseyêko tewş o û propagandaya reş a. Xora ganî îtîfaq bêro hîrakerdene. Ma zî ney rexne kenê. La HDP xêrê îtîfaqanê xo ra bendê weçînayîşan ra derbaz bi. Hem HDPyî partîyanê Kurdîstanîyan reyde zî îtîfaqêk kerd û HDP zaf giranîye dano nê îtîfaqî. DBP bi xo partîyêka Kurdîstanî ya. Nêzdîbîyayîşê sey ‘Ma teyna partîyanê Kurdîstanîyan de îtîfaq bikerê. Wa HDP partîyanê şorişgêr-hêzanê demokrasî de îtîfaq nêkero’ raşt nîyo.
Xûlasa raşt nîyo ke çew vajo ke HDP heqanê kurdan nêpaweno. Xeta HDPyî raşt a. HDP xeta xo ra semed ney, seba ke xeta xo bi qîmî nêeşka bîyaro ca weçînayîşan de ser nêkewt. Qiseyê ‘Wa HDP fikrîyatê xo war verdo’ yew rexne ney operasyonê hişmendî yê MÎT û PDKyî yo.
HDP xîret keno ke pê demokratîkkerdişê Tirkîya meseleya kurdan çareser bikero. Xora Tirkîya teyna pê xîretê HDPyî demokratîk nêbena. La ê kesê ke ney wazenê, demokrasî û azadîye wazenê HDP vervatoxîya înan keno. Beno ke HDPyî nê prosesî de tay kêmasîyî mojnayî. La ganî hêzê demokratîk û şorişgêrî yê Tirkîya yê ke mutefîqê HDPyî yê na babete de rolanê xo bîyarê ca. Êyê ke vanê HDP sey partîya herêmîye manenê, tirkîyayîj nêbena meseleya kurdan sey meseleya esase nêvînenê. ” BEHDÎNAN
