Fermandarê Qerargehê Merkezê Pawitişê Şarî (MPŞ) Murat Karayilan beşdarê bernameyêkê taybetî yê Stêrk TVyî bi. Murat Karayilanî hêverî serrgêra 36. ya Hamleya 15ê Tebaxe ya kurdan, embazan û xebatkaran fîraz kerde. Qiseykerdişê Karayilanî ra beşêk wina yo:
”Ez her kesî rê serkewtiş wazena. Tarîxê kurdan û têkoşînê estbîyayîşî de Hamleya 15ê Tebaxe wayîrê cayêkê girîngî yo.15ê Tebaxe hamleyêka tarîxî ya kurdan û têkoşînê azadî ya. Rayber Apoyî û şehîdan na hamle hende manadar kerde. Bi na wesîle ez roşanê newerabîyayîşî yê Rayber Apoyî fîraz kena, ma reyna perwerîya xo anê ziwan û selam û rêzê xo pêşkêş kenê. Ez şehîdanê Şorişê Kurdîstanî şexsê embaz Egîdî de yad kena, rîyê xo verê înan de ana war. Ma sozê xo dibare kenê ke çeka înan do erd de nêmana, têkoşînê înan do ser bikewo. Heman wextî de serrgêra şehadetê Mam Zekî Şingalî û Atakan Mahîrî ya. Ez şexsê înan de şehîdanê ma yê peyênan bi rêzdarî yad kena.
Gerîlayê Azadîye xîret kenê ke ruhê 15ê tebaxe temsîl bikerê coka têkoşîn kenê û ewro Heftanîn de şero ke qewimîyeno bala her kesî ancemo û netîceyanê girîngan aferneno.
Dewleta tirke Cengê Heftanînî de pêro îmkanê xo seferber kerdî la nêeşkena netîceyêk bigêra. Mîsal dişmenî waşt ke debikewo Pîrbûla la reyna tira vejîya. Eke îradeyê merdiman ê vera teknîkî hol bêro ercnayene hînî vera dişmenî şer eşkîyeno bêro kerdene. No reyna ame dîyene.
Ewro xeta Pîrbûla de bombardumanêko giran qewimîya. Seba ke binkewtişê înan giran bi Hulusî Akar çend generalan û fermandaranê payeberzan reyde ame û şi uja. Waştêne moral bidê beno ke plananê xo do bivurnê. Beno ke ‘hêzanê xo yê taybetan’ do bivisnê dewre. Ma pabeyê ci yê ke şerê Heftanînî zêdêr germ bibo.
Xora Heftanîn de kêmasîyê embazan zî estê. Ez pê bawer a ke eke embazî nê kemasîyan werte ra wedarê eşkenê verê dişmenî bigêrê.
Nika leşkerê tirkî pê ‘Sendromê Heftanînî’ kewtî. Leşkerê tirkî bi bahaneyan kenê ke herême ra şorê. Fermadaranê înan tira vat ke yew-di rojî. La di mengan ra nata şer dewam keno. Nêeşkenê xo biresnê çimeyanê awe zî. Awa înan pê helîkopteran Vakurî ra yena la gerîlayî ge ge danê nê helîkopteran û leşkerî bêawe manenê. Awe û werd înan rê qîm nêkenê. Yanî mabênê înan de krîzêk esto. Înan ra tayan îstîfa kerd. Vanê mabênê leşkeran û qoricîyan de zî nakokîye qewimîyena.
Gerîlayî vera leşkeran amadekarîya xo tam kenê. Ma çarçewa cîdîyetêkê pîlî de têgêrenê. Ma b hawayêkê stratejîkî nêzdîyê şerî benê. Ma bi nê hawayî do ser bikewê.
Kurdîstan de tim xeta xoverdayîşî reyde xeta bêbextî û teslîmîyetî zî estbî. Nika zî dewlete qoricîyan vera gerîlayan xebitnena. Heftanîn de wexto ke leşkerî têbigêrê hêverî înan şawenê ma verî. Seke dedektorê mayînan ê. Nika zî wazenê Başûr de qoricîyan rêxistin bikerê. Vanê ‘şima hem dewa xo pawenê hem zî pereyan gênê.’ Dewleta tirke kurdan bi kurdan qir kena.
Hînî bes o! Ganî kurdî kurdan nêkişê. Çi karê înan Heftanîn de esto? Dewlete çira ameya Heftanîn? Ma verê cû zî vat ê wazenê Başûr de herêmêka tampone awan bikerê û herême îşxal bikerê. La Heftanîn de teng bîyî mendî.
Ma vera dişmenî xo ver danê. Her çi seba şarê Başûrê Kurdîstanî yo. Ganî şar, dezgeh û parlamentoya Başûrî naye bizanê. Ganî pêşmergeyî zî tewrê ma bibê. Wa ciwanî tewrê ma bibê. Tewr nêbo wa paştî bidê ma. Hetêk de destê dişmenî de hende tank, top, tufek, teknîk û îmkanî estê. Destê ma de zî têna çeka ma esta. Ma wina şer kenê û ganî bizanê ke no şer seba şarê kurdî û şaranê herême yo.
Eke ma verê dişmenî megêre do hêrişê ereban û şaranê bînan ê herême bikero. No şer nameyê şaranê herême ser o yeno kerdene. Ganî ma naye bizanê. Wa kes dişmenîya kesî nêkero.
Ma reyna venga embazan danê ke çi Başûr çi Vakur wa kes pê plan û dafikanê tirkan mexepîyo, seba pereyan îxanet mekero û çeka dişmenî megêro. Ma venga qoricîyan danê ke wa tewrê operasyonanê tirkan mebê. No şer şerê pawitişê şarê Başûrî yo. Wa ê zî sîyasetê dişmenî oûç bikerê. Dişmen her hetî ra hêrişê ma keno. Labelê ma do dişmen çin bikerê. Ê do erdê Başûrî de bin bikewê. Qerardarîya gerîlayan a seba na mesele Heftanîn de kifş bîye.
CPTyî raporê xo yê derheqê Îmraliyî de her çi îtîraf kerd. Vat se? Îmrali de tecrîd esto û no tecrîd îşkence yo. Goreyê qanûnî tay heqê tepişteyan estê, gereka tepişteyî avûkat û keyeyanê xo reyde pêvînayîş bikerê. La înan ra kamyew Îmrali de yeno caardene?
CPT peynîya peyêne de îşkenceyê Îmraliyî tesbît kerd. Dewletê ke tewrê komploya mîyanneteweyîye bîyî pêro mesuldarê na rewşe yê. Ganî nê mesuldarîya xo bîyarê ca. Eşkerayîya înan destê welatperweran kerd xurtêr. Ganî hînî bi xurtî têkoşîn bêro kerdene. Ganî ma pêro vera sîstemê îskenceyî yê Îmraliyî têkoşînêkê xurtêrî bikerê.
Ma serrgêra 36. ya Hamleya 15ê Tebaxe de prosesêkê girîngî de yê. Kurdîstan de şerêko tarîxî qewimîyeno. No şer do amyoxê kurdan û şaranê bînan ê herême kifş bikero. Têkoşînê ma seba kurdan û şaranê herême yê ke destê faşîzmê AKP-MHPyî de xeniqîyenê, do bibo pîlêr. Nê esasî ser o ma venga welatperweran û demokratan danê ke serra 37. ya Hamle de wa tewrê têkoşînî bibê û paştî bidê ma.
Ma venga ciwananê kurdan danê ke tewrê têkoşîn û gerîlayan bibê. Firsendê ma esto ke ma na serre bikerê serra serkewtişî. Ez reyna Roşanê Newerabîyayîşî yê şarê ma fîraz kena û serra 37. ya têkoşînî de her kesî rê serkewtiş wazena.” BEHDÎNAN
