Endamê Komîteya Rayberdişî ya PKKyî Murat Karayilanî cewab da persanê Radyoyê Dengê Gelî. Qiseykerdişê Karayilanî ra qismêk wina yo:
”Ez verî sere de Rayber Apo heme xoverdayoxanê zîndanî selam kena. Roja ma de meseleya tewr muhîme ya Kurdîstan û Tirkîya tecrîd û sîstemê qirkerdişî yê vera kurdan o. Sîstemê Îmraliyî sîstemê şerî yo. Ewro sebebê feqîrîye no şer o. Qirkerdiş, îşkence û sîstemê tecrîdî yê Îmraliyî sebebê feqîrîya şarî yo. Coka na meseleya tewr muhîm a. Îqtîdar heme qezencê Tirkîya şerî rê xerc keno. Heta ke Kurdîstan de şer bibo û sîstemê Îmraliyî dewam bikero Tirkîya de ekonomî raşt nêbena. Reyna sîstemê demokrasî û huqûqî zî Tirkîya de nîna caardene. Seba ke şarê Tirkîya feqîrîye ra bixelisê ganî meseleya kurdan bêra çareserkerdene, sîstemê tecrîdî yê Îmraliyî bêro wedaritene. Seke yeno zanayene ewro vera sîstemê tecrîdî hemleyêke est a. Sere de dayîkê kurdîstanijî û xoverdayoxê zîndanî ez heme kesanê ke tewrê hemle bîyî selam kena. Seba ke sîstemê qirkerdişî bêro binkewtene ganî têkoşîn bêro xurtkerdene.
Seke yeno zanayene rejîmê AKP-MHP-Ergenekonî sey îtîfaqê vera kurdan ame ronayene ke Kurdîstan de sîyasetê qirkerdişî yê vera kurdan bido rayraberdene. Seba ke Têgêrayîşê Azadîye bi temamî bêro tesfîyekerdene û destkewteyê şarê Kurdîstanî destê ci ra bêrê girewtene no rejîmo faşîst ame ronayene. Sîstemê tecrîd û îşkenceyî yê Îmraliyî coka est o. Reyna şerê vera gerîlayan semedê nê yeno kerdene. Na çarçewa de 2016 de vera sîyasetê demoratîkî yê kurdan operasyonê qirkerdişî ame kerdene û hemserekê pêroyî yê HDPyî, parlamenterî, hemşaredarî û xeylêk sîyasetmedarê bînî ameyî hedefgirewtene. Pêro eştî zîndanan ke şarê ma bitersnê û vindarnê. Xora çend serrî îdîaneme nêame hazirkerdene û nêameyî sûcdarkerdene. Verî tepiştî dima ra înan rê sûcî afirnayî. Dewaya Kobanê semedê înan sey sûcêk vete meydan. Ê serebûtan de 37 kesan dinyaya xo bedilnaye. HDPyîjî naye ra sûcdar kerdî. Nê semedî ra plan kerd ke cezaya 38 serran bidê her yewî.
Eke waştişê rejîmê AKP-MHP-Ergenekonî vera Têgêrayîşê Azadîye yê Kurdîstanî ser bikewtêne û vindertişê Rayber Apoyî û xoverdayoxanê zîndanan, têkoşînê gerîlayan û vindertişê şarê ma çîn bikerdêne înan cezaya dahîna girane dayêne HDPyijan. La seba ke rejîmo faşîst nêresa hedefê xo nêeşka ê cezayan bido. Pawitişê bitesrî zî ameyî kerdene. Eke bina ceza medayêne no semedê înan qebûlkerdişê binkewtişî. Coka bîlasebeb cezayî dayî selahîyetdaranê HDPyî. Eke huqûq bêhet bîyêne herinda Fîgene Yuksekdag û Selahattîn Demîrtaşî de ceza dayêne Erdoganî. Çunke Erdoganî hem bi vatişê ‘Kobanê kewt, do bikewo’ şar vist kuçeyan hem zî semedê kiştişî talîmat da polîsan. Erdoganî bi xo rojdem afirna û bado ke şar kewt kuçeyan talîmatê kiştişî da. Berpirsîyar rejîmê AKP û Erdogan bi xo yo. Înan bi xo sûc kerd û kerd milê HDPyî. Eslê xo de înan waşt cezaya giranê bidê HDPyijan ke şarî wina bitersnê ke hinî çew wa qalê kurd-Kurdîstanî mekero. La nê planê înan ser nêkewtî. Xora cezayê ke dayî zî her kes zano ke bîlasebeb ameyî dayene.Rejîmî xo deşîfre kerd. Têkoşînê şarê ma û Têgêrayîşê Azadîye yê Kurdîstanî planê rejîmê faşîstî xeripnayî. Sûcdar HDP û şarê kurdî nîyê, sûcdar no rejîmo faşîst o.”
