Endamê Komîteya Rayberdişî ya PKKyî Murat Karayilanî Stêrk TVyî de tecrîdê Îmraliyî, serrgêra 100. ya Peymana Lozanî, xoverdayîşê gerîlayan, serrgêra Şorişê Rojawanî û babetê rojdemî yê bînî ercnayî.
Qiseykerdişê Karayilanî ra tay noqtayê girîngî wina yê:
”Ewro tecrîdê vera Rayber Apoyî vilayê pêro zîndanan bîyo. Dewleta tirke şer û qirkerdişê kurdan de Îmrali kerdo merkez. Dewleta tirke bi tecrîdî xîret kena ke Rayber Apo derheqê heqanê kurdan û demokrasî de apey game bierzo. Rayber Apo vera ney 25 serrî yo xo ver dano. Rayber Apo tim heqanê neteweyîyan, heqê nasnameyî, heqê ziwanî û heqê xoîdarekerdişî de isrardar o. La dewleta tirke sîyasetê îmha û înkarê kurdan de isrardar a. 25 serrî yo na rewşe dewam kena.
Seba ke Rayber Apo heqanê pêro kurdan paweno ganî kurdî zî wayîrê ey vejîyê. Ganî pêro kurdî vera tecrîdî tewirî bimojnê û seba azadîya ey xîret bikerê. Reyna Tirkîya de kam demokrasî wazeno ganî vera tecrîdê Îmraliyî vejîyo. Çunke tecrîdê Îmraliyî bingeyê pêro neheqîyan o. Dewleta tirke se kena wa bikera do nêeşka verê vilabîyayîşê felsefeya Rayber Apoyî bigêra. Seba ke tecrîd bêro şiknayene ganî ma bi hawayêkê girseyîyî têkoşîn bikerê û yew ‘pêlê serewedaritişan’ dest pêbikero.
Ez serrgêra Şorişê Rojawanî fîraz kena. Şorişê Rojawanî sey şorişêkê Kurdistanî dest pêkerd la dima bi şorişêkê şaran. Şorişê Rojawanî perspektîfê şaranê Sûrîye zî hîra kerd. Şorişê Rojawanî hetêkî ra vera hêrişanê DAIŞ û dewleta tirke xo pawit, hetêkê bînî ra zî xo awan kerd. Şorişê Rojawanî serkêşîya cinîyan de ame kerdene û bi şorişê cinîyan. Rixmo ke Rojawan binê hêrişan û ablûqa de yo, verê ci akerde yo. Şarê Rojawanî rixmê hêrişan zî şoriş de isrardar o.
Peymana Lozanî hem Kurdistan kerd çar parçe, hem şarê kurdî û Kurdistan înkar kerd hem zî bingeyê qirkerdişanê Kurdistanî eşt. Wexto ke Komara Tirkîya ronîyabî Meclîsê ê çaxî û Mustafa Kemalî soz dabî ke xoserîya kurdan qebul bikerê. La dima ke Peymana Lozanî ameye îmzakerdene, Tirkîya kurdî bi temamî înkar kerdî. Îngilîstan, Fransa û Tirkîya o çax pê Peymana Lozanî Kurdistan seba menfaetanê xo parçe kerd. Na peymane bîye bingeyê jenosîd û înkarî. 100 serrî yo na peymane ra semed qirkerdişî qewimîyenê. Mesuldarê nê qirkerdişan zî Îngilîstan û Fransa yê. Ganî Fransa û Îngilîstan pêro kurdan ra uzrê xo biwazê. Peymana Lozanî qirker a. Kamî na peymane îmza kerda qirkerdişanê Kurdistanî ra mesuldar o.
Dewleta tirke hema zî wazena ke xo biresna sînoranê Mîsak-i Mîllî. Coka dewleta tirke Başûr û Rojawanî îşxal kena. 8 serrî yo vera nê îşxalî xoverdayîşêko pîl est o. Dewleta tirke seba ke Zap de teng bîya nêeşkena planê xo yê temamkerdişê îşxalî bîyara ca. Dewleta tirke kena ke pê polîtîkayanê qirkerdişî biresa sînoranê Mîsak-i Mîllî. A raşt kombîyayîşanê NATOyî de zî naye ser o bazarîye kena.
Serrgêra 100. ya Lozanî de, şaristanê Lozanî de do konferansêko pîl bêro kerdene. No konferans zaf girîng o. Ez hêvî kena ke no konferans wa bibo bingeyê yewîya neteweyîye. Ez venga pêro kurdistanijan dana ke wa tewrê nê konferansî bibê. Ez venga pêro kurdan dana ke wa serrgêrra 100. ya Peymana Lozanî de hînî yewîya neteweyîye awan bikerê.
Dewleta tirke pê destekê NATOyî wazena Peymana Lozanî ya 2. viraza. Dewleta tirke pê bahaneya PKKyî kena ke qirkerdişê vera kurdan bida qebulkerdene. Dewleta tirke pêro kurdan sey terorîstî îlan kena. Dewleta tirke pêro kurdan xo rê sey tehdîtî vînena û nêwazena kurdî dinya ser de bibê wayîrê statu û heqan. Dewleta tirke kombîyayîşanê NATOyî de nê çîyan ser o bazarîye kena. Ez venga şar, hunermend, sîyasetmedar û roşnvîranê hemwelatîyanê endamanê NATOyî dana ke nêbê hemkarê qirkerdişanê dewleta tirke.
Dewleta tirke vera gerîlayanê ma çekê nuklerî yê taktîkî şuxilnayî. Nê çekî NATOyî dabî ci. Tewr peyên 13ê temmuza 2023yî de Zap de nê çekî şuxilîyabî. Nê çekî sey erdlerzî tesîr kenê. Bêguman dewleta tirke pê tesdîqê NATOyî nê çekan şuxilnena. Gerîlayî teyna welatê xo vera terorê dewleta tirke pawenê. Wa NATO nêbo hemkarê qirkerdişanê dewleta tirke û nê çekan nêdo ci.
Başûr de Zîndanê Hewlêrî de di ciwanê kurdî (Mazlûm Dag û Abdurrahman Er) 60 rojî yo grevê vêşanîye de yê. Nê ciwanan rê bi hawayêkê neheqî cezaya îdamî dîyabî. Eke nê ciwanî rojeyê mergî de şehîd bibê serekwezîr û serekê Herêma Kurdistanî do şerm nêkerê? Ganî waştişê nê ciwanan bêrê qebulkerdene. Ganî kurdî wayîrê zîndananê winayênan nêbê. Berê Sînorî yê Sêmalka de tedbîrê winayênî est ê ke merdim şaş maneno. No bero ke mabênê Rojawan û Başûrî de yo yew netewe girê dano. Gelo nê sîyasetmedaranê kurdan ê Başûrî de qet yew hîso neteweyî çin o? Ganî kurdî xo mîyan ra hesabê winayênî wedarnê û bi hîsanê neteweyîyan têbigêrê. Ez hêvî kena ke Konferansê Lozanî de çîyê winayênî zî do çareser bibê.
Dewleta tirke 3 serrî yo Zap de teng mendo. Artêşa tirke ya ke qaşo artêşa tewr pîle ya diyîne ya NATOyî ya, rixmê çekanê qedexekerdeyan zî pê xoverdayîşê gerîlayan nêeşkena. Dewleta tirke do qetî nêeşka kurdan, gerîlayanê ma, îrade û estbîyayîşê ma çin bikera. Dewleta tirke seba nê şerî pêro îmkanê xo seferber kerdî la ser nêkewte. Dewleta tirke wa hînî sîyasetê qirkerdişî ra fek vera bida. Serkewtiş ê ma yo. Ez venga pêro ciwananê ma û şarê kurdî dana ke hîna zaf tewrê têkoşînê Kurdistanê Azadî û Tirkîyaya Demokratîke bibê.” BEHDÎNAN
