Endamê Komîteya Rayberdişî ya PKKyî û Fermandarê Qerargehê Merkezê Pawitişê Şarî Murat Karayilanî bi wesîleya serrgêra ronayîşê PKKyî têkoşînê gerîlayan ercna.
Qiseykerdişê Karayilanî ra qismêk wina yo:
”Seke yeno zanayene Darbeya 12ê Êlule vera prosesê şorişî yê Tirkîya û Kurdîstanî bi destê NATOyî plankerde ame kerdene. Eslê xo de waştêne ke verê têgêrayîşê azadîye yê Kurdîstanî bêro girewtene. Tersê înan o bi ke têgêrayîş bêro merheleya gerîlayan. Xora bi keda pîle ya Rayber Apoyî o wext ameyêne waştêne ke têgêrayîş têkoşînî bikirişo merheleya gerîlayan. Bitaybetî koma ke serkêşîya Kemal Pîr û Mahsum Korkmazî (Egît) de Filistin de perwer de dî, bi na koma ameyêne waştene agêrê welat û nê waştişî bîyarî ca. Bado ke embaz Kemal Pir ame tepiştene û belgeyê serê ci de kewtî dest, dişmen pêhesîya ke wina yew plan est a û coka cuntaya xo girewt ver. Heme kadroyê Têgêrayîşê Azadîye ke ameyî tepiştene Zîndanê Amedî de ameyî cakerdene û raştê îşkenceyanê giranan ameyî ke tarîxê merdimîye de tay ameyî vînayene.
Tîya vera nê serkêşîya Mazlum Dogan, Ferhat Kurtay, Mehmet Hayri Durmuş û Kemal Pirî de Xoverdayîşê Zîndanê Amedî dîya destpêkerdene ke ercê ci yê tarîxî est o. Vera polîtîkaya qirkerdiş û tirkkerdişî yê dişmenî sere ame wedaritene û şertanê zîndanî de na polîtîkaya ameye binfînayene. Na rewşêka zaf muhîm a. Nê xoverdayîşî tewr za paştî daye newera destpêkerdişê têkoşînê Rayberîye û têkoşînê estbîyayîşê kurdan û têkoşînê înan de cayê ci pîl o.
Projeyo bîn ê dişmenî propaganda bi. Xora verî wextê Şerê Dinya yê Verênî kurdî bi rayîrê dînî ameyî xapînayêne û pêra sozê ke ameyî dayene nêameyî caardene û vera kurdan hêrişan dest pêkerd. Cuntaya 12ê Êlule de zî wina kerd. Înan Rayber Apo sey ermenî ramojna û PKK û Asala secîye hesibnayî. Hetê bînî ra meydananê dewan de îşkenceyî kerdî, kurdkî qedexe kerd. Hemleya hîrêyine zî Kurdîstan de dînî serê vîndetî û Tirkîya de zî no aver berd. Têgêrayîşê Fethullah Gulenî o wext bi pîl. Seba ke kurdan ercanê ci û têkoşînî ra bifînê dûrî, kerdêne ke verê înan bidê dînî. Bi qala kilmî têgêrayîşê cunta her hetî ra hêrişê komelî kerd.
Kurdîstan bibi sey zîndanê akerdeyî. Wextê winayênî de agêrayîşê welatî xora zehmet bi. Gerîlayan rixmê heme zehmetîyan xo resna Kurdîstan, verê musayî koyan, komel nas kerd sere de Botan komel rinda nas kerd. Embazan şarî sero tesîro pîl kerd. Kam dewa ke embazî çend rey têdima şiyênî ci dewijî cade bedilyayênî. Paşta şarî embazan ra pêt bî la eynî wextî de ê zaf kewtêne embazan ver. Vatêne înan vera dewlete serewedarito do pêro bimirê. Çunke tarîxî ra heme vervejîyayîşê kurdan binkewtbî. Coka komel amebi tersnayene. Komel pê bawer nêbi ke vera dewlete ser bikewo. Badê Hemleya 15ê Tebaxe her kesî teqîp kerd, meraq kerdêne, vatêne heta çiwex keno derg.
Bitaybetî serra 85 semedê ma zaf zehmet bî. Çunke rîyê zextanê bişîdetî û tay xîyanetan ra ma xeylêk cayan de darbe werde, şehadetê ma bibî. Mesela Garzan de heme heme pêro komayê ma tesfîye bîyî, têna di embazî mendî. Reyna Amed, Çewlîg û xeylêk cayanê bînan de derbe ameyî werdene. Ma o wext hêzanê xo ra se de70-80 şehîd dayî. Xora ma tay bî zaf nêbî. Hemleya 15ê Tebaxe şarî de hêvîya pîle û qesawet afirnabi. Hem pawitiş û qesawet bibi. Nê dewrî de embaz Egîd semedê rapordayîşî Warê Rayberîye de bi. Bitaybetî agêrayîşê embaz Egîdî û wisarê 86 de şehadetê ci ra dima qesawetî her hetî ra zêdîyayî. Rayber Apoyî bi kongreya hîrêyîne mudaxale kerd û no çîyêko tarîxî bi. Gerîlayan vervejîyayîşo hemlekî kerd û 87î ra dima prosesê averdişî dest pêkerd.
Nê dewrî de gerîlayan zaf problemî ciwîyayî. Bitaybetî badê şehadetê embaz Egîdî, îdareyo verên yewna warî de ame wezîfekerdene û îdareyêkê neweyî înîsîyatîf girewt xete û kontrolkerdiş de prosesê zehîfbîyayîşî qewimîya. Tayînan no sey firsetî dî û kerd ke zîhnîyetê xo bidê ciwîyayene. Çeteyê Çarî ke Rayber Apo tim rexne keno û ercneno nê dewrî de ciwîya. Bi tay kerdişan ame waştene ke têgêrayîş komelî rê xelet bidîyo naskerdene. La rixmê nê gerîlayî vera hemeleyanê dişmenî tesfîye nêbîyî û têgêrayîş sey vewrgude çend şi pîlêr bi. Nê şarî de hêvîya pîle afirnaye. Şarî pê çimanê xo dî ke narey sey serewedaritişanê verênan nîyo. Coka tewrbîyayîşê şarî zî zêdîya.
Xora prosesê serhiladanî zî na çarçewa de dest pêkerd. Ganîbîyayîşo ke ma vanê, eslê xo de no yo. Komelo ke hêvîya ci nêmenda, teslîm ameyo girewtene, ameyo bêvengkerdene, nêeşkeno wayîrê xo bivejîyo bi têkoşînê gerîlayan wirişt payan ser. Komelo merde wina newera ganî bi û werişt payan ser. Rayber Apoyî nê rê vat ‘Şorişê Ganîbyayîşî’. Mesele her cayê dinya de têgêrayîşê şarî bi waştişanê cîya cîyayan vejîyeno kuçeyan la Kurdîstan de şar verî semedê merasîmê cenazayanê gerîlayan vejîya kuçeyan. Verî Nisêbîn û dima ra Cizîre de merasîmî ameyî kerdene û nê bîyî bingeyê serhildanî. Yanî motorê prosesî eslê xo de gerîla yê.” BEHDÎNAN
