Endamê Komîteya Rayberdişî ya PKKyî Murat Karayilanî Radyoya Dengê Welatî de rojdem ercna.
Qiseykerdişê Karayilanî de beşê yewinî de nê noqtayê girîngî vejîyayî vernî:
”Newroza 2024î bi hawayêkê pîlî û girseyî ameye pêşwazîkerdene. Oyo tewr girîng no yo ke na Newroze de seba azadîya Rayber Apoyî veng dîya. Bi mîlyonan merdiman yewfekî ra azadîya Rayberîye waşte. Na Newroze ancî îsbat kerd ke Rayber Apo lîderêko pîl û global o. Şarê ma qetî kerd ke o do wayîrê Rayberîye vejîyo.
Ma prosesêkê tarîxî de yê ke dewleta tirke ha amadekarîya şerî kena. Şarê ma Newroze de vera şerî zî tewirê xo eşkera kerd û mijdanîya ma ya serê gerîlayan zî fîraz kerde. Xûlasa na Newroze Newrozêka normale nêbîye. Ez pêro beşdaranê Newroze selam kena. Newroze seba azadîya Rayber Apoyî û çareserîya meseleya kurdan bîye platformêkî.
Ma Newroze de mijdanîyêke daye şarê xo; hinî îmkanê ma est ê ke ma droneyanê çekdaran ê artêşa tirke îmha bikerê. Na xeberêka girînge bîye; çunke dişmenî bi nê çekan şarê ma tehdît kerdêne. Ma wina bawer kenê ke no qewimîyayîş seba averşîyayîşê têkoşînê gerîlayan gamêka pîl a. Dişmen do ancî xîret bikero ke bi droneyanê xo hêrişê şarê ma bikero. Yanî ma nêeşkenê vajê ke ‘her çi qedîyayo.’ Ney, ganî ma ancî tedbîranê xo bigêrê. Gerîlayê azadîye ganî bi taktîk û teknîkê xo hemsengîye virazê û tedbîranê xo ancî bigêrê.
Ma Roja Qehremanîye ya 28ê Adare û Hewteyê Qehremanîye yê 21-28ê Adare de yê. Seke zanîyeno 21ê adare roja şehadetê embaz Mazlûm Doganî ya û 28ê adare roja şehadetê embaz Egîdî (Mahsum Korkmaz) ya. Ez şexsê embaz Mazlûm û Egîdî de pêro şehîdanê ma bi rêz û minetî yad kena. Embaz Mazlûmî xeta xoverdayîşê zîndanan û embaz Egîdî zî xeta xoverdayîşê gerîlayan dîyar kerde. Înan serkêşîya qehremananê ma kerde.
Her şar û welatî wayîrê qehremananê xo yê û sayê nînan ra bîyê welat û şar. Kurdîstan de wexto ke qirkerdiş û polîtîkayê înkar û îmha est bîyê serkêşîya Rayber Apoyî de PKKyî têkoşîn da destpêkerdene. Wextêkê kilmî de PKK bi partîya qehremanan. Ewro zî no tradîsyonê PKKyî dewam keno. Ewro şagîrtê embaz Mazlûmî zîndanan de grevê vêşanîye de yê. Şagîrtê embaz Egîdî zî 40 serrî yo koyan de şer kenê. Şer û têkoşînê ma bingeyê qehremananê ma de dewam kenê. Nê new serranê peyênan de zî têgêrayîşê ma ra qehremanê pîlî vejîyayî. Ez şexsê embazanê ma Sara, Rûken, Rojhat, Erdal, Bager û Avzeman de nê qehremanan yad kena. Xûlasa bê qehremanîye nêbena. Seba ke yew netewe est ba ganî qehremanê ci est bê. Şarêko ke qehremanê ci yê fedakarî est ê qetî do ser bikewo.
Seba hêrişê vera Moskova ez şarê Rûsya rê serweşîye wazena û DAÎŞî bi tûjî şermezar kena. DAÎŞî no hêriş girewt xo milî. La her kes zaneno ke peyê DAÎŞî de dewleta tirke est a. Baska Xorasanî ya DAÎŞî ya ke no hêriş kerdo Tirkîya de manena û têkilîya ci ya bi MÎTî est a. Goreyê zanayîşê ma peyê hêrişê Moskova de MÎT est o. Ganî Rûsya raştîyanê nê hêrişî eşkera bikera.”
