Endamê Komîteya Rayberdişî ya PKKyî Murat Karayilanî Bernameyê Taybetî yê Stêrk TVyî de rojdem ercna. Qiseykerdişê Karayilanî ra qismêk wina yo:
”Seke yeno zanayene vera Rayber Apoyî sîstemê îşkenceyê psîkolojîkî yeno rayraberdene ke çîyo winayên dinya de çîn o. Bi nê sîstemî yeno waştene ke kurdî bêrê qirkerdene û Kurdîstan de sîyasetê qirkerdişî bêro rayraberdene. Coka vera Rayber Apoyî wina tecrîd yeno domnayene. Rixmê heme zextanê înan paradîgmaya Rayber Apoyî ewro heme dinya de yena munaqeşekerdene û zafane yena qebulkerdene. Gerek semedê azadîya fîzîkîye ya Rayber Apoyî têkoşîn bêro xurtkerdene. Wextê azadbîyayîşê Rayber Apoyî ame yo.
Erdlerz felaketa girde bî. Bêşik seba ke tedbîrî nêameyî girewtene şarê ma dahîna zaf zirar dî. Ma dejê şarê xo pare kenê. Şar vano ke seba ke elewî, kurd û erebî hukmatî ci rê hetkarî nêkerd. Ma vînenê ke nika kenê ke Kurdîstanî veng bikerê. Mexdûranê erdlerzî bajaranê înan ra vejenê. Sîyaseto wina leymin est o. Wa şarê ma erdê xo cameverdo. Êyê ke şîyî zî wa agêrê. Erdlerz de paştîdayîşê şarê ma zî ame dîyene. Şarê ma wayîrê yewbînî vejîya.
Ma sey têgêrayîşê qerarê vindarnayişê çalakîyan girewt. No nizdîbîyayîşo însanî û komelkî yo. Hukmatê AKP-MHPyî goreyê nê qerarî nizdî nêbi. Hêrişî dewam kenê. Rixmê hêrişan hêzê ma hema goreyê qerarî têgêrenê. 2022yî de têkoşîno tarîxî ame dayene. Gerîlayan waştêne zimistan nê têkoşînê xo tacîdar bikerê la ma badê erdlerzî çalakîyî vindarnayî. Dişmenî nê qerarê ma ra îstifade kerd. Mesela Besta de hêriş kerd embazê ma şehîd bîyî. Vera Herêmanê Pawitişî yê Medya zî hêrişî dewam kenê.
Na dewlete de însanîyet çîn o. Hende însanî binê enkazî de mendê, herinda xelisnayîşê înan de dewlete hêriş kerdêne. Xora şer û erdlerz pabesteyê yewbînan ê. Dewlete herinda tedbîrgirewtişî de heme pereyî şerî rê xerc kena. Beno ke wextê vîjnayîşî de hêrişê vera Herêmanê Pawitişî yê Medya, Başûr û Rojawanî giranêr bê. Coka gerek her kes hîsgêr bo û tedbîr bigêro.
Wazenê Tirkîya de kaos bibo, şaran verdêne pê ke dişmenêk biafirnê. Xora dişmenê înan kurd ê, PKK yo. HDP û partîyê bînê ke endamê Îtîfaqê Kede û Azadîye hedef genê. Înan sey PKKyî genê dest. La eleqeyê ma bi înan çîn o. Dişmenîya vera kurdan Bursa de bi hêrişê vera Amedsporî zî ame vînayene. Ma kurdî gerek nê bizanê, Amedspor seba ke Amedî temsîl keno raştê hêrişî ame. No hêriş vera heme kurdan ame kerdene.
Wazenê HDPyî bidê xapî ro. Eceb o gerek lîsteya vîjnayîşî 10ê nîsane de bêro teslîmkerdene û qerarê qefilnayîşê dewaya HDPyî 11ê nîsane de yo. Wazenê vajê, eke sey mi mekero ez qefilnena. Eke HDP namzedê xo yê serekkomarî vejo, beno ke o wext ez bifikîryê. Mesajê winayênî danê. Gerek her kes vera kayan hîsgêr bo.
Newroze têna roja şayîye nîya. Semedê ma, şarê ma manaya ci gird o. Nika Kurdîstan de rîyê erdlerzî ra şîn est o. Coka dezgehanê demokratîkan ê kurdan qerar girewt ke Newroze emser do sey wayîvejîyayîşê mexdûranê erdlerzî bêro pîrozkerdene. Xora Newroze esle xo de xurtkerdişê xoverdayîşî ya. Ez tîya ra veng dana şarê ma û dostan ke wa emser zafêr tewrê Newroze bibê.
Dewleta tirke û waşt emser vera ma ser bikewo la wina nêbi. Dewleta tirke bi xoverdayîşî ameye vindarnayene. Têna yew rayîr est o; o zî rayîrê çareserî yo. Muxatapgirewtişê Rayber Apoyî yo. Yewna rayîr çîn o. Şarê kurdî îradeyê xo mojna û rayîrê çareserî nîşan da la nika gerek zafêr no îrade bêro mojnayene. Coka tewrbîyayîşê Newroze muhîm o. Wa çew mevajo, rîyê erdlerzî ra şîn est o ez nêşina. Newroze yew sembol a. wa şarê ma tewrê Newroze bibo û ruhê yewîye xurtêr bikero.
Înanê ke heta ewro hetê dişmenî girewt û bi ajanîye gonîya ewladanê kurdan rişnaye, wa bizanê ke dewleta tirke heme kurdan sey dişmenî vînena. Kam ke nê mevîno do siba pîman bibo û verê tarîxî de hesab bido. Ev veng dana kurdanê ke vera şarê xo kişta dişmenî de ca genê, wa nê caverdê.
Serekê YNKyî Birêz Bafil Talabanî semedê yewîya neteweyî veng da. No vengdayîş zaf muhîm bi. Raşta zî demê winayên de çîyo ke tewr muhîm yewîya neteweyî ya şarê Kurdîstanî ya. Cehdkerdişê ma zî no yo. Na çarçewe de ma Newroze 2023yî bikerê bikerê destpêkerdişê yewîya neteweyî yê. Serrgêra 100. ya Lozanî de ma sey kurdan bibê yew û bimojnê heme dinya ke ma est ê. Ameyox ê ma yo. Rayraşîyayîşê azadîye yê Rayber Apo û Kurdîstanî do ser bikewo. Neroza 2023yî do biba destpêkerdişê nê.” BEHDÎNAN
