Derheqê parlamanteranê verênan ê HDPyî Huda Kaya, Serpil Kemalbay, Fatma Kurtulan, Pero Dundar û Garo Paylanî de bi sebebê protestoyanê 6-7-8ê teşrîna verên a 2014î yê ke vera hêrişê DAÎŞÎ yê vera Kobanê ameyî kerdene dewa amebî akerdene. Roniştişo verên ê dewa Mehkemaya Cezaya Giran a 22. ya Anqara de ame kerdene. Huda Kaya ke 8 mengî yo çarçewaya dosya de Zîndanê Marmara de yena tepiştene roniştişê verênî de ameye tehlîyekerdene û zîndanî ra vejîyaye.
Huda Kaya hetê wekîlanê DEM Partî, merdimanê xo û xeylêk kesan ra bi vilkina û slogananê “Jin jiyan azadî”, “Bijî berxwedana zindanan” ameye pêşwazîkerdene.
Kaya ke vejîyayîşê zîndanî de qisey kerd ard ziwan ke a bîlasebeb 8 mengî ameye tepiştene û vat: ”La nika pêyê nê dêsan de embazê ma yê ke 8 serrî yo tepişteyî est ê, zîndananê bînan de embazê ma yê ke bi desan serran o tepişteyî est ê. Coka wextê winayênî de çew nêeşkenê qala 8 mengan bikero. Tay ya zî zaf her kes raştê neheqîye yeno. Zerrîya ma peyê nê dêsan de ya. Merdimê zaf rind, masûm, pakî zere de yê. Her hetê welatî de neheqîye dewam kena. Ez pêro dostan rê spas kena ke paştî daye ma.”
