Parlamentera HDP’ê ya berê Huda Kaya ku ji doza Kobanê hat binçavkirin, piştî îfadeyê sewqî dozgeriyê ya Komarê ya Enqreyê kirin. Dozgeriyê jî Kaya sewqî 4’emîn Dadgeha Cezayê Silhê ya Enqereyê kir. Heyeta 4’emîn Dadgeha Cezayê Silhê ya Enqereyê jî piştî li îfadeya Kaya guhdar kir, der barê Kaya de biryara girtinê da. Hevserokên Giştî yên Partiya Wekhevî û Demokrasiyê ya Gelan (HEDEP) Tulay Hatîmogûllari û Tuncer Bakirhan bertek nîşanî girtina Huda Kaya dan.
Hatîmogûllari, li ser hesaba xwe ya medyaya civakî wiha got: “Di 1’ê Mijdarê Roja Kobanê ya Cîhanê de parlamentera me Huda Kaya hate girtin. Ev yek, peyameke siyasî ya îktîdarê ye. Biryara girtinê, biryareke derhiqûqî ye û siyasî ye. Yên ku hêviya xwe girêdayî operasyonên qirkirina siyasî kirin, xwe pir mezin dixapînin. Em bi rêhevala Hudayê re ne. Em ê bi hev re li ber xwe bidin û bi hev re azad bibin.”
Bakirhan jî li ser hesaba xwe ya medyaya dijîtal ev peyam da: “Banga me ji bo îktîdarê ye ku di 1’ê Mijdarê Roja Kobanê ya Cihanê de li ser parlamentera me Huda Kaya peyamê dide me. Em ê li hemberî dozên we yên kompasê tu carî bêdeng nemînin. Huda Kaya çawa li hemberî darbekarên 28’ê Sibatê serî netewandibe, dê li hemberî darbeyên we yên siyasî jî serî netewîne.”
