Tepişteyo neweş Abdulalim Kayayo 88 serre yo ke se ra 91 astengdar o,seba ke 2008 tewrê eşkerayîyêka çapemenîye bi derheqê ci de dewa ameye kerdene û hetê Mehkemeya Cezaya Giran a 5ine ya Dîyarbekîrî ra bi îdîaya “propagandaya rêxistine” cazaya 5 serran dîyaye ci. Na ceza 2011 de ameye testîqkerdene.
Kaya 2020 nêweşîya prostatî ra ameliyat bi û hema ke encê amelîyatî nêameyî girewtene 14ê teşrîna verên a 2020î de keyeyê xo de ame destbendkerdene û ame berdene Zîndanê Qefilnayeyî yê Tîpê Hyî yê Bursa. Têna yew velgê Kayyaî xebiteyeno. Kaya nêweşê Demans û qelbî yo û reyna prbolemê ci yê çiman û goşan zî estê.
Lajê Kayayî, Îsmaîl Kayayî derheqê rewşa weşîya babîye xo de nê vatî: “Wexto ke babîyê mi newe ame tepiştene di aşmî hucreyê yewkesan de mend. Rixmo ke nêweşo giran o, nêame veradayene. 2021 de raporê se ra 91 astengdar o dîya ci. Veng nêşino ci, çimê ci nêvînenî. Yew velgê ci îflas kerdo. Nêweşê demans û qelbî yo. Babîyê mi nêeşkeno miqatê xo bo. Bi hetkarîya gardîyanan yeno pêvînayîş û zere de embazê ci hewcadarîyanê ci anê ca. Ez veng dana rayapêroyî ke wa semedê babîyê mi û heme tepişteyanê nêweşan hîsgêr bo. Gerek rayapêroyîya mîyanneteweyî zî vera na rewşe bêveng memano. Mi heta ewro dosyaya babîyê xo xeylêk selahîyetdaran ê şawite la cewab nêgirewt. Eke cenazaya babîyê mi zîndanî ra vejîyo, her kes o ke bêveng mendo, do berpirsîyar bo.”
