Konseya Giştî ya Tevgera Şoreşê ya Yekbûyî ya Jinan (KBDH) bi wesîleya 8’ê Adarê Roja Jinan a Cîhanê daxuyaniyek weşand.
Di daxuyaniyê de 8’ê Adarê li jinên têkoşer ên li Tirkiye û bakurê Kurdistanê û hemû nasnameyên zayend ên bindest hat pîrozkirin û weke KBDH’ê bi coş hat silavkirin.
Di daxuyaniyê de hat gotin, “Li cografyayên cuda; li Ewropa, Latîn Amerîka, Rojhilata Navîn, Îran, Rojhilat û Rojavayê Kurdistanê, li Tirkiyeyê jinên ji neteweyên cuda li dijî heman dijminî, li hemberî qedexeya kurtajê, xizanî, talankirina ked û bedenê, li hemberî desthilatdariyên faşîst, şerê emperyalîst, dagirkerî, tecrîd û serweriya mêr nîşan dan ku bi dirûşma ‘Jin, Jiyan, Azadî’ têkoşîn dikare bê meşandin.
Faşîzm û serweriya mêr bi polîtîkayên şer, dagirkerî, krîza aboriyê û zayendîperestiyê li her qadê jinan dorpêç dike. Faşîzma AKP-MHP’ê bi talankirina destketiyên jinan, bi polîtîkayên muxafazakar ên neo-lîberal hewl dide malbatê xurt bike. Bi taybetî li dijî jinan tundiya patriyarkal, destavêtin, destdirêjî, kuştin û rizandina civakî zêde dibe.”
Di daxuyaniyê de hat ragihandin ku polîtîkayên talankarî û dagirkeriyê yên faşîzma AKP-MHP’ê yên li ser Şoreşa Rojava bênavber dewam dikin.
Di dewama daxuyaniyê de wiha hat gotin: “Dewleta tirk a faşîst û bi serweriya mêr, bi rêya dadgeriya xwe tecawizkaran, kujeran diparêze, lê belê jinên ku xwe diparêzin ceza dike. Desthilatdariya faşîst a AKP-MHP’ê ji bo parastina kiryarên tundiyê bi saziyên xwe yên qanûndanîn, rêveberî û dadgeriyê bûn yek.”
KDBH’ê ragihand, ku desthilatdariya AKP-MHP’ê bi sîstema xwe ya zordar û zilmê paşerojekê nade jinan û destnîşan kir ku ev desthilatdarî li ser mafê jiyanê yê jinan ên li Tirkiye û Kurdistanê gefeke mezin e. Mîna beşên din ên civakê, jin jî li hemberî zêdebûna êrîşan ji têkoşînê venagerin. Li dijî faşîzma AKP-MHP’ê ku şênberiya dijminatiya li jinan a li Kurdistan û Tirkiyeyê ye, jin bi heman daxwazê serî hildidin.”
‘Di 8’ê Adarê de li qadan bin’
Di daxuyaniyê de hate destnîşankirin ku wê vê sîstema mêtingeriyê teqez têk bibin û li dijî faşîzm û kapîtalîzma patriyarkal banga mezinkirina têkoşînê hat kirin.
Bi vê armancê jî bang li hemû jinan hat kirin ku li her devera cîhanê di 8’ê Adarê de dakevin qadan û ev tişt hat gotin: “Li dijî sîstema bi serweriya mêr a li cîhanê, Rojhilata Navîn, Tirkiye û bakurê Kurdistanê em ê bi raperîn, hêrsa xwe heta ku dijmin bi rengekî topyekûn têk bibin, faşîzm û serweriya mêr têk bibin, têkoşîna xwe dewam bikin.”
