KCDK-E seba rayraşîyayîşê merkezî yê 7ê çeleyî eşkerayîyêke daye. Eşkerayîye de dîya zanayene ke 3 cinîyê şorişgerî Sakîne Cansiz, Fîdan Dogan û Leyla Şaylemez 10 serrî verî 9ê çeleyê 2013î de Paris de hetê MÎTî ra ameybî qetilkerdene û qirkerdiş qetî nêame roşnîkerdene. KCDK-E vist vîrî ke dewleta tirke nêzdîya serrgêra nê qirkerdişî de, 23ê kanûne de Paris de hîrê kurdî bînî Emîne Kara (Evîn Goyî), Mîr Perwer (Mehmet Şîrîn Aydin) û Abdurrahman Kizil qetil kerdî.
KCDK-E vat: “Heta ke nê wird qirkerdişan roşnî nêkera û hesabê ci nêpersa dewleta Fransa do nêeşka mesuldarîyanê xo ra bixelisa. Ganî Fransa dewleta tirke muhakeme bikera. 9ê çeleyê 2013î ra nata şarê kurdî, cinîyê kurdî û dostê ma gêrenê edaletî. Ganî dewleta Fransa cade nê qirkerdişan ser o cigêrayîş bikera û keyeyanê şehîdan û şarê kurdî ra uzrê xo biwaza. Ma venga pêro kurdîstanijanê Ewropa û dostanê xo danê ke seba protestokerdişê Qirkerdişanê Parisî têbigêrê û wayîrê şehîdanê xo vejîyê. Ma sey KCDK-E venga şarê xo û dostanê xo danê ke 7ê çeleyî de tewrê rayraşîyayîşê merkezî bibê û Qirkerdişê Parisî yê 9ê Çeleyê 2013î û 23ê Kanûne protesto bikerê.”
