Welatanê cîya cîyayan ê Ewropa ra kurdî û dostê înan ê ke bajarê Den Haagî yê Hollanda de ameyî têhet Rêxistina Qedexekerdişê Çekanê Kîmyewîyan (OPCW) şermezar kerd. Rayraşîyayîş Meydanê Malieveldî de dest pê kerd û çalakwanî verê berê Parlementoyê Hollanda û Şaredarîye ravertî. Gama ke çalakwanî verê Konsolosxaneyê Tirkîya ra ravêrtî ciwananê ke waşt dewleta tirke şermezar bikerê la raştê hêrişê polîsanê Hollanda ameyî.
Konfederasyonê Komelanê Kurdistanijan ê Ewropa (KCDK-E) û Têgêrayîşê Cinîyan ê Kurdan ê Ewropa (TJK-E) bi eşkerayîyêka hempare hêrişê polîsanê Hollanda yê vera mîtîngê Den Haagî şermezar kerd.
Eşkerayîye wina ya: “Seba şermezarkerdişê hêrişanê kîmyewîyan ê dewleta tirke ya faşîste û bêvengîya OPCWyî 1ê teşrîna peyêne de şaristanê Den Haagî yê Hollanda de bi beşdarîya bi hezaran kesan mîtîngêk ame kerdene.
Mîtîng de fotografê gerîlayanê ke pê çekanê kîmyewîyan ameyî qetilkerdene ameyî berzkerdene, bêvengîya Yewîya Ewropa, OPCW, NATO û dewletan ameye teşhîrkerdene û kurdîstanijan pê kincanê sipîyan çekê kîmyewîyî şermezar kerdî. Temsîlkarê xeylêk dezgehanê demokratîkan ê Ewropa, KCDK-E, TJK-E, dezgehê kurdîstanijî, yewîya hêzan, cinîyî, doman, ciwan û kokimî tewrê çalakîye bîyî.
Hela peyêne ya rayraşîyayîşî de ke bala çapemenîya Hollanda zî ser de bîye, polîsanê Hollanda bi hawayêkê bêînsafî, bi şîdet û bi astoran hêrişê şarî kerd. Netîceya nê hêrişî de 30 çalakîkerî birîndar bîyî ke rewşa 2yê nînan giranêr a, 10 kesî zî bi hawayêkê cidîyî birîndar bîyî. Heta nika 12 çalakîkerî zî ameyî destbendkerdene.
OPCWyo ke xo kerr, kor û lal keno rixmê hende delîlan zî vera qirkerdişê gerîlayan bêveng maneno, nê rayraşîyayîşî de ame şermezarkerdene. Çalakîkeran zî vera tewirê OPCWyî, Yewîya Ewropa û Neteweyanê Yewbîyayeyan heqê xo yo demokratîk şuxilna. Labelê polîsanê Hollanda sey polîsanê tirkan şîdet kerd. Ma nê şîdetî şermezar kenê.
Ma nê şîdetê hukmat û polîsanê Hollanda şermezar kenê û pbeyê ci yê ke polîsî û hukmat şarê kurdî û çalakîkeran ra uzrê xo biwazê. Çalakîye hetê pêro dezgehanê çapemenîye yê Hollanda ra bi baldarî ameye teqîbkerdene. Şîdetê polîsan çapemenîye zî mat verdaye. Nameyê TJK-E û KCDK-E ser o ma çalakîkeran fîraz kenê. Ganî bizanîyo ke vera na neheqîye vera hêrişanê qirkeran û bêvengîye her ca de ma do têkoşînê xo heta peynî dewam bikerê.”
