Navenda Nûçeyan |
Koordînasyona Civaka Êzidî ya li Ewropayê (KCÊ-E) li ser êrîşên li dijî Şengalê ku vê dema dawiyê zêde bûne daxuyaniyek da.
Koordînasyonê bal kişand ser destwerdan û êrîşa leşkerên Iraqê ya li navçeya Sinûnê ku di encama gulereşandinê de 2 ciwanên Şengalê birîndar bûn.
Koordînasyonê ev êrîş weke heman feraseta DAIŞ’ê ya li dijî civaka êzidî pênase kir û wiha got: “Di rojên cejn û rojiyên civaka me de li Şengalê êrîşên bi vî rengî tên kirin. Ev yek jî karakter û armanca dewleta tirk, rêveberiyên Bexda û PDK’ê radixe pêş çavan. Ev êrîş teqez dijminatiya li hemberî baweriya Êzidiyatiyê ye.”
Di daxuyaniyê de hat destnîşankirin ku çawa DAIŞ bi ser neket, wê dewleta tirk a hevalbendê DAIŞ’ê jî bi ser nekeve.
Di daxuyaniyê de bêdengiya rêveberiya dewleta Iraqê û herêma Kurdistanê jî hat bibîrxistin û hat destnîşankirin ku bêdengî tê wateya pejirandina van kiryarên hovane yên dewleta tirk.
Koordînasyonê ragihand ku civaka êzidî di bin gef û êrîşan de ye û wiha got: “Li dijî vê yekê di serî de civaka me divê tevahiya gelê kurd, heval û dostên me yên hestiyar rabin ser pêyan.”
