KCK: Dewrêk ke hêrişê hemverê Başûrê Kurdistanî bîyê zêde, hemra Helmeto ke şorişgêrêko pîl ê Başûrê Kurdistanî bi hedef ame girewtene
Hemserîkaya Konseya Rayberdişî ya KCKyî eşkerayîyêka nûştekîye daye û vat ke endamê Konseya Serekîya Pêroyî ya KCKyî Dîyar Xarîb (Helmet) û gerîlayê bi nameyê Devran û Şahîno ke roja 5ê Temmuze de Qendîl de rastê hêrişê hewayîyî yê teyareyanê şerî yê artêşa Tirkî ameyî şehîd kewtê.
Eşkerayîya KCKyî wina ya:
“5ê Temmuze de, netîceyê hêrişê hewayîyî yo ke serê Qendîlî de ame kerdene de endamê Konseya Serekîya Pêroyî ya KCKyî embaz Helmet (Dîyar Xerîb) pîya bi di embazan Devran û Şahînî (Abdulkadîr Aslan) şehîd kewt. Ma şehîdanê xo bi minet bi vîr anê. Ma do bi xatirê pêgirewtişê bi vîrameyîşê înan mucadeleyî hîna bikerê xurt, qetîyen Kurdistanê Azadî û Rojakewtena Demokratîke virazê. Ajanê ke nê hêrişî de rol kay kerdê zî do rew-erey bêrê cezakerdene.
Şehadetê hemra Helmetî bi tesadufî nêbîyo. Pîya bi hemkar û ajananê dewleta tirkî yê ke Başûrê Kurdistanî de yê biplan ameyo kerdene. Nê rojanê ke hêrişê hemverê Başûrê Kurdistanî bîyê zêde, hemra Helmeto ke şorişgêrêko pîl ê Başûrê Kurdistanî bi hedef ameyo girewtene. Bi nê hêrişî ameyo waştene ke hem derbe bidîyo Têgêrayîşê ma yê Azadîye ro hem zî mucadeleyê şarê Başûrê Kurdistanî yê hemverê îşxalî bêro zihîfkerdene.
Dejê şarê Başûrê Kurdistanî ardê ziwan
Hemra Helmet 25 serrî yo sefanê mucadeleyê azadîye de her wareyî de mesuldarîye girewta. Hemra Helmeto ke Rayber Apoyî ra perwerde girewto endamîya Komîteya Merkezî ya PKKyî û Konseya Rayberdişî ya KCKyî kerda, awankerdişê PÇDKyî de pîya bi Ş. Vîyan Sorane ca girewto, serekîya pêroyîye û hemserekîye kerda. Bi zanayîşê xo yê tarîxî yê xorîyî heme perwerdeyanê ma de desrê Tarîxê Kurdistanî dayê, bi nê hawayî bîyo sebeb ke hemrayê ma, mîlîtanî û şarê Kurdistanî bibê wayîrê hişmendîya raste yê tarîxê xo.
Seba ke bêvengîya Başûrê Kurdistanî biqedêno xebate kerdêne
Hemra Helmet hemverê hêrişê dewleta tirkî yê serê Xakurkê û îşxalê Başûrê Kurdistanî de paştdayîşê hêzanê Başûrijan û bêvengbîyayîşê înan sey xefletêko tarîxî ercnayêne. Bi hişmendîya ke eke xeta mucadeleyê Têgêrayîşê Azadîya Kurdan a Rayber Apoyî ra dûrî bikewê do qezencê Başûrê Kurdistanî zî bikewê tehluke hemra Helmetî Başûrê Kurdistanî de xebatî rayra berdêne. Sey perçeyêkê nê xebatanê xo şi Qendîl û Pêşmergeyanê Derînî dir pêvînayîşî kerdî. Waşt ke reaksîyonê şarî, organîzasyonanê cimatî yê sivîlan û hêzanê sîyasîyan ê Başûrê Kurdistanî vejo werte. Nê dewrî de hemverê hemra Helmetî de virazîyayîşê na komplo û hêrişî zî ramojnenê ke no hêriş bi rayîrê ajananê ke hemkarê îstîxbaratê tirkî MÎTî bîyê ameyo kerdene.
Şarê Kurdistanî lajêkê xo yê zaf ercayeyî vînî kerd
Sere de şarê Başûrê Kurdistanî hemeyê şarê Kurdistanî ewladêkê xo yê xeylî ercayeyî vînî kerd. Şar, hêzê sîyasîyî, organîzasyonê cimatî yê sivîlan, ciwanî û ciwananê Başûrê Kurdistanî embaz Helmet nizd ra nas kerdêne. Bi şexsîyetê xo yê mutewazî û qerardarî şarê Başûrê Kurdistanî ser o tesîrêko pîl kerdo û şehadetê ê zî do hende bitesîr bo. Şarê Başûrê Kurdistanî do vînîkerdişê nê şorişgêrê pîlî wextêko derg xovîr ra nêkero. Bêguman do tewirê êyê hemverê hemkarî, xefletî zî û hîsê êyo neteweyî do Serewedartişanê Başûrê Kurdistanî de biciwîyo û bêro ciwîyayene.
Ma veng danê şarê Başûrê Kurdistanî, sey nîşanêkê nê tewirî ewladê xo hemra Helmetî yo ke sembolê yewîya neteweyîye û ruhê Serewedartişî bi dereceyêka tewr berze de bipawê, hemverê kesanê ke mîyanê xefletî de yê û kolonyalîstanê qirkerdoxan ê îşxalkaran rê cewabo ke lazim o bidê.” BEHDÎNAN
