Komîteya Karanê Teberî ya KCKyî derheqê zîyaretê Iraqî yê Serekkomarê Tirkîya Erdoganî de eşkerayîyêke daye. Eşkerayîye wina ya:
”Erdogan do 22yê nîsane de Bexdad û Hewlêr de zîyaretanê resmîyan bikero. Her çiqas armancê nê zîyaretan sey têkilîyanê ekonomîk û tîcarîyan ameyo îfadekerdene zî Tirkîya esil armanc kena ke îşxalê xo yê Iraqî û 87 baregehanê xo yê leşkerîyan resmî bikera û planê xo yê hêrişanê neweyan meşrû bikera. Dewleta tirke armanc kena ke bi bahaneya ‘asayîşî’ erdê Iraqî de waranê îşxalî yê neweyan abikera.
Erdogan serdestîya erdê Iraqî binpay keno, hêrişanê hewa û erdî keno, sivîlan bi bombayan qetil keno. Dewleta tirke nê hêrişan bi destekê PDKyî kena. Şarê kurdî û komelê Iraqî têkilîya Tirkîya-PDKyî û îşxalê Tirkîya ra razi nîyê. Erdogan ney zaneno coka keno ke hukmatê Bexdadî ra paştî bigêro û îşxalê xo mende bikero.
Tirkîya bi bêîstîkrarkerdişî polîtîkaya xo ya teberî awan kena. Hetê bînî ra teybetmendîya Erdoganî ya ke o ewro vano ‘he’ la siba do vajo ‘ney.’ Wa şarê kurdî û komelê Iraqî hol bizanê ke îqtîdarê Erdoganî mende nîyo. Ganî hukmatê Bexdadî zî na raştîye bivîno û Erdoganî reyde têkilîyanê dergan nêkero.
Partîya Erdoganî îqtîdarê AKPyî weçînayîşanê 31ê adare de binkewtişêko giran werd û reya verêne bîye partîya diyîne. Krîzê ekonomîkî sîyasetî rê zî tesîr kerd û mojna ke îqtîdarê Erdoganî mende nîyo.
Dewleta tirke gerîlayanê PKKyî xo rê kena bahane û amadekarîya hêriş û îşxalê neweyî kena. Têgêrayîşê ma serranê 80an ra nata komelê Iraqî û dewleta Iraqî de têkilîyanê dostane û birêzan keno û qetî mabênê ma û nînan de alozîyêke zî nêqewimîyaya. Gerîlayan seba pawitişê Mûsil, Kerkûk, Hewlêr, Şingal û Mexmûrî 2014 de vera DAÎŞî şer kerd û bi desan şehîdî dayî. Wextê nê şerî de dewleta tirke paştî daye cerganê DAÎŞî.
Seba ke Tirkîya erdê Iraqî de mende biba teyna PDK xizmetê ci keno. Ganî PDK cade peynîya têkilîyanê xo yê bi îqtîdarî bîyaro û aleyhê Iraqî de Tirkîya de hemkarîye nêkero.
Komelê Iraqî, şarê kurdî, partîyê sîyasîyî, komelê sivîlî, roşnvîr, nuştox û çapemenîya Iraqî ganî vera hêrişanê neweyan û îşxalê Tirkîya vinderê. Wa vera plan û xîretanê îşxalî tewir bêro girewtene.”
