Hevseroktiya Konseya Rêveber a KCK’ê têkidarî cejna Newrozê daxuyaniyeke nivîskî da û cejna Newrozê pîroz kir.
Daxuyaniya KCK’ê ya derbarê Newrozê de wiha ye:
“Gelê Kurdistanê û Rojhilata Navîn pêşwaziya Newrozeke din dikin. Di serî de Mazlûm Dogan, Zekiye Alkan, Rahşan Demîrel, Bêrîvan, Ronahî, hemû şehîdên Newrozê ku giyanê Newrozê heta îro anîn bi hurmet û minet bi bîr tînin. Em Newroza Rêber Apo pîroz dikin ku gelê kurd kirî gelê Newrozê û hemû nirxên neteweyî, civakî û çandî yê di Newrozê de derxistî holê. Em Newroza gelê serhildan û gelê Newrozê ya gelê kurd, a gerîlayên ku li çiya û deştan şer dikin, a hemû şervanên azadiyê yên li zindanan pîroz dikin. Em bawer dikin ku Newroza 2021’an bi pêngava ‘Dem dem azadiyê ye’ re dê bibe yek, desthilata faşîst a AKP-MHP’ê hilweşîne û di azadkirina gelê kurd û Rêber Apo de bi roleke mezin rabe, bi vê bingehê em bang li tevahiya gelê kurd dikin ku ber bi qadên Newrozê ve biherikin. Van rojên dawî li ser tenduristiya Rêber Apo agahiyên neçê hatine bihîstin. Ji vî alî ve jî divê Newroza 2021’an bibe Newroza şikandina tecrîdê û azadkirina Rêber Apo û pêngava ‘dem dema azadiyê’ were geşkirin. Ev Newroz divê bibe Newrozeke wiha ku dilsoziya bi Rêber Apo bi asta bilind were nîşandan û bibe Newrozeke ku wê kesek nikaribe dest bide Rêber Apo.
Îro zêdetir hewcedarî bi têkoşîna hevpar a gelan heye
Îro li Kurdistanê û Rojhilata Navîn tam rewşa beriya niha bi 2633 salan tê jiyîn. Desthilata faşîst a AKP-MHP’ê ne ku tenê zilmê li gelê kurd dike, polîtîkayeke wiha dike ku siberoja hemû gelên Rojhilata Navîn reş dike. Rê û rêbazên ku bi kar tîne, ji zilma Deheqê zalim a li ser gelan kirî, zêdetir e. Tam weke beriya niha bi 2633 salan, hewceyî bi wan gelan heye ku bi pêşengiya Kawa serî hildane. Sala 2021’an tam jî weke beriya niha bi 2633 salan divê bibe sala rabûna ser pêyan e û hilweşandina desthilata faşîst a AKP-MHP’ê ku Dehaqên niha ne. Pîrozbahiya Newroza 2021’an li her deverê divê bi vê hedefê were pêkanîn.
Newroz hem roja parastin û xurtkirina hebûna gelê kurd û nirxên neteweyî ye û hem jî li ser hîmê xwîşk û biratiya gelan roja geşkirina têkoşînê ya li dijî zaliman e. Di roja berdest de ji her demê zêdetir hewcedarî pê heye ku gel bi hev re têkoşînê geş bikin. Gelê kurd li ser hîmê pêkanîna yekitiya xwe bi gelên cîran re dema ku li dijî zaliman bi hev re têbikoşe hem wê hebûna xwe ya neteweyî mîsoger bike û hem jî gelê Rojhilata Navîn azad bike. Ji ber ku îro têkoşîna dijî desthilata faşîst a AKP-MHP’ê hem têkoşîna hebûna neteweyî ye û hem jî têkoşîna azadbûna gelên Rojhilata Navîn e.
Gelê kurd ev 30 sal in bi serhildanên ku Newrozan kirî bûye hêza pêşeng a azadiyê ya hemû gelên Rojhilata Navîn. Nexasim têkoşîna azadiyê ya jinên kurd nirxên xweşiktiya li nirxên Newrozê yên bi hezaran salan zêde kirine, gelê kurd ku gelê Newrozê ye, bûye roj û qibleya ku mirovahî ji bo azadiyê berê xwe dayê.
Her qada Newrozê divê bibe qada geşkirina têkoşîna azadiyê
8’ê Adarê jinên kurd nîşan dan ku jinên kurd hêza herî çalak a têkoşîna azadiya jinan a cîhanê ye, vê jî nîşan daye ku Newroza 2021’an bi giyanê azadiya jinan bi rengekî xurtir dê were pîrozkirin, daniye holê ku dawiya mêtingerên qirker û hemû zaliman nêzîk e. Jin û ciwanên kurd divê daxwaza li azadiyê û kelecaniya xwe ya 8’ê Adarê bigihînin Newrozê, her qada Newrozê divê bibe qada ku têkoşîna azadî û demokrasî lê geş bûyî.
Pîrozbahiyên Newrozê yên bi dehan salan, tecrûbe û bêrîkirinên şehîdan ku di van serhildanan de şehîd bûne, Newroz kirine ew demên ku gelê kurd têkoşîna jiyana azadî û demokrasiyê bi asta herî bilind rê ve birî. Hêza jiyana azad û demokratîk a di giyanê Newrozê de bi wê hêzê ye ku dikare her cure zilmê hilweşîne. Ji ber vê zalim û hêzên qirker di her Newrozê de ditirsin. Di Newroza 2021’an de bi vî giyanî li her deverê bi hêzeke mezin divê mirov xwe berde meydanan û tişta ku zalim jê ditirsin mirov bîne serê wan.
Fedayiyên gelê kurd, weke agirê ku Kawayê Hesinkar li qesra Dehaqê Zalim pêxistî, agirê Newrozê pêxistine. Agirê ku Kawayên Hevdem li Garê pêxistin, li deştan, çiyayan, gundan, li taxan û li her deverê divê were geşkirin û sala 2021’an bike sala azadiyê.
Êdî dema wê hatiye ku bi Rêbertiya Azad re û bi welatê azad re were jiyîn.” BEHDÎNAN
