9ê Çeleyê 2013î de Paris de Sakîne Cansiz, Fîdan Dogan û Leyla Şaylemeze ameyî qetilkerdiş. Dima ra qezaya Silopî ya Şirnexî de endama Meclîsê Partîye (PM) ya Partîya Herêmê Demokratîkî (DBP) Sêvê Demîr, aktîvîsta Kongreya Cinîyanê Azade (KJA) Fatma Uyar û hemsereka Meclîsê Şarî ya Sîlopiyî Pakîze Nayire 4ê Çeleyê 2016î de badê qedexeyê tebervejîyayîşî bi guleyê ke wesayîtê zirxinî ra ameyî reşênayîşî, ameyî qetilkerdiş. Edîtora jineolojîye rojnameger Nagîhan Akarsele Silêmanîye de ameye qetilkerdiş. Tewr peynî zî 23ê kanûne de Evîn Goyî, Mîr Perwer û Abdurrahman Kizilî hêrişê vera Merkezê Kulturê Kurdan ê Ahmet Kayayî yê Parisî de ameyî qetilkerdene.
Hemserekîya Konseya Rayberdişî ya KCKyî serrgêra Qirkerdişê Parisî yê 9ê Çeleyî ke Sakîne Cansiz, Fîdane Dogan û Leyla Şaylemez ameyî qetilkerdene, de eşkerayîya nuştekîye daye. Hemserekîye eşkerayîya xo de şorişgêrê ke qirkerdiş de şehîd bîyî yad kerdî û vat ê do têkoşînê înan ser bifinê.
Eşkerayîye ra tay cayî wina yê: “Şarê ma yo ke Ewropa de ciwîyeno 9ê Çeleyê 2013î ra nata pê têkoşînê xo yê biheybetî qikerdoxan ra hesab perseno. Qirkerdişê diyînî yê Parisî de zî vindetişê birumet yê têkoşîn û xoverdayîşî vet werte. 7ê çeleyî de no têkoşîn kirişîya merheleya tewr berze. Ma nê vindetişê birumet û ercîyayeyî yê şarê xo bi heskerdiş hurmetî selam kenê, pîroz kenê. Têkoşînê şarê ma rdo aştîye vejo werte.
Dewleta tirke estbîyayîşê xo besto çînbîyayîşê kurdan. Zere û teber de heme îmkanê xo kerdê xizmetê na polîtîkaya faşîste ya qirkere. Seba ke astengo tewr gird yê verê nê sîyasîyê qirkerdişî Têkoşînê Azadîye yê Kurdîstanî yo, koyan de her qeyde çekanê kîmyewîyan şuxulnena. Welatê Ewropa vera nê hêrişan bêveng ê. Coka dewleta tirke înan ra hêz girewt û hêrişê xo yê qirkedişî heta Ewropa kiriştî. Seba ke koyan, deştan û bajaranê Kurdistan de nêeşkaye têkoşînê azadîye bişikino dest pê qetlîamanê polîtîkan kerd. Tay yewinê îstîxbaratî yê dewletana Ewropa ya paştî danê nê qirkerdişanê şebekeyê sûcî ya zî vera ci bêveng manenê.
Nêzdîbîyayîşê Fransa sey dewletêka xosere nîyo. Seba ke Fransa serê qirkerdişê verênî yê Parisî girewt, qirkerdişê diyînî ame kerdene. Eke Fransa eşkera bivatayêne Qirkerdişê 9ê Çeleyî hetê Erdogan û MÎT ê, hesab biperdayêne qirkerdişo bîn do meqewimîyayêne.
Şarê kurdî têkoşînê vera DAIŞî yo ke bîyo belayê heme dinya, de 10 hezarî ra zafêr şehîd dayî û 20 hezarî ra zafêr kesî birîndar bîyî.Vera hêrişanê serê nê bêveng mendiş ya zî serê ci girewtiş paştdayîşê dewleta tirke yo ke dostê DAIŞî ya. Her kes hole zano ke dewleta tirke cinîyê ke têkoşînê vera DAIŞî de bîyî sembol hedef geno ke qesasê DAIŞî bigêro. Eke Fransa nêwezena bibo hemkarê hêrişanê AKP-MHP-DAIŞî ganî nê wird qirkerdişê ke erdê ci de ameyî kerdene safî bikero. Eke qirkerdiş mero eşkera kerdene û berpirsîyarî cezaya xo meancê Fransa do hetê kurdan û merdimîye ra sey sûcdare bêro hesibnayene û verê qirkerdişanê bînan bêro akerdene.
Coka ma veng danê Fransa ke wa wayîrê ercanê demokratîkan ê Ewropa bivejîyo û nê ercan qurbanê menfeatanê xo yê sîyasîyan mekero. Ma şar û dostanê xo ra zî wazenê ke heta roşnîkerdişê qirkerdişan wa çalakîyanê xo yê demokratîkan bidomnê. Ma serrgêra şehadetê 10. yê înan de hemrayanê xo Sara, Rojbîne û Ronahî reyna bi heskerdiş û hurmetî yad kenê û sozê serekwtişî newe kenê.” BEHDÎNAN
