Komîteya Şar û Bawerîyan a KCKyî bi wesîleya qedîyayîşê Rojeyê Muharemî eşkerayîyêke daye. Eşkerayîye wina ya:
”Muharem qedîya ke xoverdayîşê Kerbena bi îbadetî tede ame yadkerdene. Ma hêvîdar ê ke rojeyê Kerbela û loqmayê Germîya Îmaman ê Muharemî bêrê qebulkerdene. Ma bawer kenê ke dua û îbadetê misilmananê Şîa do bêrê qebulkerdene.
Êyê ke xoverdayîşê Hz. Huseyînî yê Kerbelayî yad kenê wayîrê erjanê pîlan vejîyenê. Wa rojeyê 12 Îmaman ê elewîyan bêro qebulkerdene, wa Hz. Huseyîn bibo hemra, Xizir û hetkarê înan. Şehîdanê Kerbelayî reyde ma pêro şehîdanê şorişî bi rêzî yad kenê. Ma soz danê ke tim bibê perwerê şehîdan.
Elewîyî xoverdayîşê vera zulmê Kerbelayî bi vilakerdişê loqmayan, yadkerdişê şehîdan û perwerîya xo eşkera kenê. Xoverdayîşê Kerbelayî tradîsyonê têkoşînî yê vera zulm û neheqîye temsîl keno. Seba komalanê Rojhelatê Mîyanênî xoverdayîşê Kerbelayî nê wextî de zî vera zulm, zorbazîye û Yezîdî bi hişmendî û ruhê xoverdayîşî hêz dano.
Îtîfaqê AKP-MHPyî yo faşîst sey Yezîdê nê çaxî vera şaran, cinî, ciwanan û elewîyan Yezîdî ra zêdeyêr zulmî keno. Coka eke elewîyî xeta Kerbelayî de têkoşîn nêkerê her wa do bibo warê zulmê sey Kerbelayî. No îqtîdaro faşîst dibistanan ra malayan tayîn keno, dewanê elewîyan de camî virazeno, cemxaneyan rê statuyê îbadetxaneyî nêdano û bi nê hawayî Kerbelayê Yezîdî ano ca.
Vera nê kerdişanê ke bi sentezê Tirk-Îslamî yenê kerdene, eke bi metodê Hz. Huseyînî xoverdayîş nêro kerdene trajedîyê pîlî vera elewîyan do biqewimîyê. Xoverdayîşê Hz. Huseyînî yê Kerbelayî çimeyê hêzî yo. Xoverdayîşê vera zaliman de Kerbela û Hz. Huseyîn seba elewîyan krîter ê. Ma pê bawer ê ke elewîyî hemwelatîya têdûşte biwazê, têkoşînê demokrasî berzêr bikerê û esas bikerê.
Ganê ercîyayeyî;
Bi wesîleya na roje ma wazenê bivisnê vîrî ke vera zulmo ke bîyo sebebê şînê Muharemî elewîyî ganî têkoşînê demokrasî yê Tirkîya û şarê kurdî de cayê xo bigêrê. Ma venga pêro elewîyan danê ke vera zulmî, bi tewirê Huseyînî tewrê têkoşînê demokrasî bibê. Bi wesîleya Muharemî ma venga pêro terefgîranê azadî û edaletî danê ke têkoşînê demokrasî berz bikerê. Sere de elewî û misilmanê Şîa ma venga pêro ê kesanê ke pê têkoşînê Îmam Huseyînî bawer kenê, danê ke vera rejîmê sentezê Tirk-Îslamî cepheyê hemparî de têkoşînê demokrasî berz bikerê.
Bi nê hîs û fikrî ma reyna hêvî kenê ke Rojeyê 12 Îmaman wa bibo wesîleya haştîye û wayûbiratîye. Ma vanê ke wa xizmetê elewîyan ê şînê Muharemî wa bêrê qebulkerdene. Ma sere de elewîyî ê kesanê ke seba heq û azadîye vera zulmî têgêrenê selam kenê.”
