Hemserekîya Konseya Rayberdişî ya KCKyî semedê Haydar Işikî yo ke vizêr dinyaya xo bedilnaye mesajê serweşîye pare kerd û nê vatî:
“Ma şehadetê nuştoxê kurdî yê erjayeyî û embazê ma yê têkoşînê azadîye Haydar Işikî bidejî eşnawit. Ma keyeyê ci û heme şarê Kurdîstanî rê serweşîye wazenê. Ewladêko sînaye yê Dêrsim û kurdan bi ke Terteleyê Dêrsimî mezg, zerrîye û heme hucreyanê xo de hîskerdêne. Heta hela peyêne vera qirkerdoxan hersbîyaye bi. Êyê ke Terteleyê Dêrsimî de ameyî qetilkedene çirey xo vîr a nêkerdî û nêdayî vîrakerdene. Vîrakerdiş semedê ey xîyanet bi. Coka Terteleyê Dêrsimî û polîtîkayê qirkerdişî yê ke Dêrsim de yenê caardene tim nuştî. Waştişê ci yo tewr pîl o bi ke dêrsimîjî wa nê terteleyî xo vîr a mekerê. Waştêne ke sere de ciwanê Dêrsimî wa heme dêrsimijî têkoşînê Kudîstanê Azadî û Dêrsimê Xoserî de ca bigirê. Bi romanê Memik Agayo Dêrsimijî reyna şehîdê terteleyî û înanê ke zilm dîyo fînayî şarê Dêrsimî vîr.
Haydar Işikî emrê xo semedê têkoşînê azadîye yê Kurdîstanî da. KONGRA-GELo ke çarçewaya paradîgmaya Rayber Apoyî de 2003 de ame ronayene, delegeyê ci bi. Tewrê na kongre bi û têkoşînê azadîye yê şarê kurdî de berpirsîyarîye girewt. KONGRA-GEL de heme hemrayan Haydar Işikî ra zaf hes kerd û binê tesîrê ey de mendî. Demo peyên de rîyê nêweşîye ra aktîf mîyanê têkoşînî de ca megêro zî tim bi hîsan û estbîyayîşê xo moral paştî daye têkoşînî. Têkoşînê azadîye yê kurdan semedê ey manaya cuye bî. Şarê Dêrsimî, şarê kurdî û hemrayê ci yê têkoşînê azadîye do çirey ê xo vîr a mekerê û semedê ey do têkoşînî pîlêr bikerê. Rûhê ci yo ke şi heqîya xo wa bibo şad.” BEHDÎNAN
