Konseya Hemserekîya Rayberdişî ya KCKyî derheqê teqayîşê Taksîmî de eşkerayîyêka nuştekîye daye. Eşkerayîye wina ya:
“13ê teşrîna peyêne de teqayîşê Meydanê Taksîmî-Îstîklalî de xeylêk merdiman dinyaya xo bedilnaye û birîndar bîyî ke no ma xaf xemgîn kerd. Ma dejê xo anê ziwan û serweşîye wazenê. Ma nê hêrişî bi xurtî şermezar kenê û lanet kenê ke eşkera yo no hêriş vera ameyoxê demokratîkî yê şaranê Tirkîya bi destanê tarîyan ameyo kerdene. Rixmo ke Fermandarîya MPŞyî da zanayene ke yew eleqeyê înan bi nê hêrişî çin o AKP-MHPyo faşîst û dormeyê înan keno ke nê hêrişî bikero milê têgêrayîşê ma. Çunke nê wazenê raştîye binimnê û plananê xo yê tarîyan bîyarê ca. Ma venga her kesî, rayaumûmîya demokratîke û çapemenîye danê ke seba eşkerakerdişê raştîyanê nê hêrişî têbigêrê. Sûcdarkerdiş û îftîrayê AKP-MHPyî yê vera têgêrayîşê ma qetî raşt nîyê û nîyetê nê hêrişî nimnenê. Merdim ser ra biewno tira zî vîneno ke no hêriş kerdişê AKP-MHPyî yo. Coka ma roşnvîr, demokrat, çapemenî, medya û hêzanê sîyasîyan ê Tirkîya rê îfade kenê ke seba eşkerakerdişê raştîyan têbigêrê.
Îtîfaqê AKP-MHPyî yo faşîst sîyasetê dişmenîya vera kurdan ano ca û sond werdo ke têgêrayîşê azadîye yê kurdan biqedîno û kurdan qir bikero. Nê îqtîdarî seba ney zî heta ewro destê ci ra çi ameyo kerdo, pêro metodê vera merdimatîye ardî ca, qirkerdiş û îşxalî kerdî. Îtîfaqê AKP-MHPyî rixmê nînan zî nêresa armancê xo coka dest eşt çekanê kîmyewîyan. AKP-MHPyî bi nê hawayî hem sûcê şerî û vera merdimatîye kerdî hem zî şarê Tirkîya binê tometî de verdayî. La çekanê kîmyewîyan zî ê nêxelisnayî û rîyê înan o raştikên vejîya werte. Îqtîdarê AKP-MHP se keno wa bikero do nêeşko vera kurdan, cinîyan û hêzanê demokrasî ser bikewo. Wa her kes bizano ke AKP-MHPyî armanc kerdêne ke kurdan qir bikero, têgêrayîşê kurdan tasfîye bikero û Tirkîya de rejîmê faşîzmî awan bikero. La netîceya xoverdayîş û têkoşînî de îqtîdar bin kewt. AKP-MHP zaneno ke şar hînî paştî nêdano ci û weçînayîşan de do ser bikewo. AKP-MHP hînî teşhîr bîyo û teng mendo.
Aseno ke AKP-MHP seba ke na rewşe ra bixeliso planê neweyî yê bi metodanê tarîyan kerdê ke hêrişê Taksîmî nînan ra yew o. Ma reyna anê ziwan ke hêrişê Taksîmî plano tarî yo newe yo û wa her kes hişyar bibo, pê qiseyanê AKP-MHPyî bawer nêkero. AKP-MHP xîret keno ke sey wextê têgêrayîşê Garê Anqara yê 10ê teşrîna verêne zemîn û prosesêkî awan bikero. No plan xîretê cuya hempare yê şaranê Tirkîya û kurdan keno hedef. Wa pêro terefgîrê demokrasî û cuya hempare vera nê planê tarîyî tewir bigêrê û seba pûçkerdişê nê planî têbigêrê.
Seba bahaneya îşxalî Rojawanî keno hedef
Dewleta AKP-MHPyî ya faşîste qestî ra nê hêrişî kena milê têgêrayîşê ma û wina mojnena ke seke hêriş Rojawanî ra ameyo kerdene. No texrîfat o. Her kes zaneno ke asta tewr pîle ya planê qirkerdişê kurdan îşxalê Rojawanî yo. AKP-MHP bi nê hêrişî armanc keno ke newe ra îşxalê Rojawanî bahaneyêke virazo. Wextê nê hêrişî zî manadar o. Nê wextî de ke eşkera bi AKP-MHP çekanê kîmyewîyan şuxilneno, cenazaya leşkeranê xo vêşneno, Tirkîya mîyanê krîzê ekonomîkî de ya, şarî hînî paştî nêdano AKP-MHPyî û hesabê sîstemê mafya-cergan ê îqtîdarî yeno perskerdene, îqtîdar bi nê hêrişî keno ke paştdayîşê şarî bigêro. Key proseso tarî dest pêbikero verî qirkerdiş û hêrişê wina tarîyî yenê kerdene û kurdî yenê sûcdarkerdene. Armancê hêrişê Taksîmî zî no yo. Qestî ra yeno mojnayene ke hêrişkere seke Rojawan yan zî Sûrîye ra ya. Hêrişkere kamca ra bena wa biba yew eleqeyê hêzanê Rojawanî yan zî yew eleqeyê ma bi nê hêrişî çin o. Xora hêzanê Rojawanî zî no vat. Wa her kes na raştîye bizano û mebo hemkarê planê tarî yê AKP-MHPyî. Têgêrayîşê ma qetî sivîlan hedef nêkeno, hêriş û planêkê winayênî nêkeno. Ma têgêrayîşêko winayên ê ke vera hêrişanê AKP-MHPyî xo ver danê, gêrenê çareserîya demokratîke ya meseleya kurdan, seba demokratîkbîyayîşê Tirkîya xîret kenê û seba nînan têkoşîn kenê. Rixmo ke na raştîya têgêrayîşê ma hol zanîyena her tewiro ke ma sûcdar keno do xizmetê plananê tarîyanê AKP-MHPyî bikero.
Îtîfaqê AKP-MHPyî yo faşîst netîceya xoverdayîş û têkoşînê kurdan, cinîyan û hêzanê demokrasî de ame asta rijîyayîşî. Hînî no îtîfaq nêeşkeno planê xo yê faşîstî bîyaro ca û payan ser de vindero. Eşkera bi ke ê çekanê kîmyewîyan şuxilnenê coka kewtê mîyanê zorîye. Ameyoxê Tirkîya pabesteyê rijîyayîşê nê îtîfaqî yo. Ganî bi nê planê tarî her kes raştîya AKP-MHPyî bivîno û vera ci têkoşîn bikero. AKP-MHP seba ke raştîyan binimno cenazayanê leşkeranê xo zî vêşneno. Raştîya AKP-MHPyî na ya. Ê kesê ke vanê faşîst nîyê, dişmenê kurdan nîyê yanî vanê terefgîrê AKP-MHPyî nîyê wa na raştîye bivînê û seba ke rayaumûmîye zî raştîye bivîna xîret bikerê. Nê kesî wa bikerê ke AKP-MHP do nêeşko çapemenîye û medya bêveng bikero, raştîyan binimno. Êyê ke merdim, demokrat û wayîrexlaq ê ganî wina têbigêrê.
Ma reyna nê hêrişî şermezar kenê û seba merde û birîndaran dejê xo pêşkêş kenê. Ma reyna sey têgêrayîşê azadîye yê kurdan soz danê ke utopyaya azadîye û demokrasî bîyarê ca û seba ney tim têkoşîn bikerê. Ma reyna bi zelalî anê ziwan ke yew eleqeyê têgêrayîşê ma bi nê hêrişî çin o. AKP-MHP keno ke nê hêrişî bikero milê ma. No xîretê înan zî mojneno ke AKP-MHP mîyanê plananê gemarinan ê neweyan de yo. Coka ma ancî venga her kesî danê ke baldar, hişyar bibo û raştîye fam bikero.” BEHDÎNAN
