Hemserekîya Konseya Rayberdişî ya KCKyî derheqê hêrişanê nîjadperestan ê Belçîka de eşkerayîyêke daye.
Eşkerayîye wina ya:
”Kurdê Belçîka wexto ke şayîya Newroze ra agêrayêne raştê hêrişanê nîjadperestan ameybî. Keyeyê kurdan gêrîyayî binê ablûqa, ferdê nê keyeyan rehîn tepişîyayî û xîret ame kerdene ke nê kesî bêrê qetilkerdene. Nê hêrişê vera kurdan dewam kenê. Erdogan û medyaya şerî seba dewamkerdişê nê hêrişan xîret kenê. Ma nê hêrişanê faşîstan şermezar kenê. Nê hêrişî sey Qirkerdişê MAdimakî xîretê qirkerdişî yê.
Nê hêrişî netîceya planê îqtîdarê AKP-MHPyî yê ke pê berzbîyayîşê têkoşînê şarê ma nêeşkeno. Îqtîdar xîret keno ke bi nê hawayî têkoşînê şarê ma qels bikero û şarê ma bitersno. Şarê ma bi coşêkê pîlî çar parçeyanê Kurdîstanî û teberê welatî de Newroze fîraz kerde, vera îşxalker û xayînan tewirêko xurt mojna û perwerîya xo ya bi têkoşînê azadîye û Rayberîye eşkera kerde. No tewirê şarê ma şi zorê îqtîdarê AKP-MHPyî.
Hemleya Azadîye ya ke 10ê teşrîna verêne de hetê dostanê ma ra amebî îlankerdene têkoşînê şarê ma kerd global û şaran ra destekêko pîl girewt. La AKP-MHP xîret keno ke hêrişanê xo yê vera şarê ma dinya rê meşrû bikero. Îqtîdarê AKP-MHPyî seba ke na hemle hîna zaf pîl nêba nê hêrişê Belçîka organîze kerdî û waşt ke şarê ma û ciwananê ma provake bikero, bi nê hawayî têkoşînê azadîye reş bikero.
Zaf girîng o ke şarê ma, dost û dezgehê ma bi na rewşe hayîdar ê û bi tewirê xo verê provakasyonan gênê. Ganî şar û dostê ma tewirê xo bi çalakîyanê demokratîkan bimojnê û rayîrêkê bînî rê muracat nêkenê. Ma ney teqez kenê û bawer kenê ke şarê ma yê Ewropa do nê esasî ser o têbigêro.
Bi nê hêrişan ancî vejîya werte ke dewleta tirke û îqtîdarê AKP-MHPyî pêro Ewropa rê gefan wanenê. Nê hêrişkerê nîjadperestî DAIŞî ra cîya nîyê. Xora aya ke DAIŞî weye kena dewleta tirke ya. Ne hêrişê Belçîka ne zî hêrişê Moskova tesadufî nîyê. Ganî dewleta Belçîka verê nê hêrişan de bêveng nêmana.
Ganî bizanîyo ke peyê nê hêrişan de AKP-MHP est o. Nêzdîbîyayîşê dewletanê Ewropa eşkerakerdişê raştîyan ra dûrî yo. Îqtîdarê AKP-MHPyî pêro Ewropa bi fiktanê dînperest, faşîst û nîjadperestan rêxistin û çekdar keno. Ma venga dewletanê Ewropa danê ke nêzdîbîyayîşê xo bivurnê. Nê hêrişkerî teyna kurdan ney pêro şaranê Ewropa kenê hedef. Ma venga şarê xo zî danê ke çalakî û nawnayîşanê demokratîkan ra ver muracatê provakasyonan mekero.”
