Hemserekîya Konseya Rayberdişî ya KCKyî bi eşkerayîyêke hêrişê Îranî yê vera şarî û hêzanê kurdan şermezar kerdî.
Eşkerayîye wina ya:
“Dima ke cinîya kurde Jîna Emînî hetê hêzanê dewleta Îranî ra bi îşkenceyî ameye qetilkerdene, Rojhelatê Kurdistanî de çalakîyanê şarî dest pêkerd û Îranî ra vila bîyî. Seba ke Îranî bi şîdetî mudaxeleyê çalakîyan kerd nê çalakîyan de xeylêk merdimî kişîyayî. Nê çalakîyan serkêşîya cinîyan de dest pêkerd û waştişê azadî û demokrasî yê komelê Îranî bi taybetî ê cinîyan ard ziwan. Coka hêriş û şîdetê Îranî yê vera çalakîkeran û qetilkerdişê merdiman nêno qebulkerdene. Nameyê têgêrayîşê azadîye yê kurdan ser o ma do nê tewirê hêrişkerî yê dewleta Îranî şermezar kenê û kesanê ke ameyê qetilkerdene bi rêzdarî yad kenê.
Dewleta Îranî hêrişanê vera çalakîkeran reyde Başûrê Kurdistanî de zî hêrişê hêzanê Rojhelatê Kurdîstanî kerd. Seba ke dewleta Îranî kurdan sey mesuldaranê ney vînena hêrişê kurdan û rêxistinanê kurdan û Rojhelatî kena. Netîceya hêrişan de xeylêk şorişgêr, welatperwer û sivîlî ameyî qetilkerdene. Ma nînan bi rêzdarî yad kenê û şarê Kurdîstanî û hêzanê Rojhelatî ra serweşîye wazwenê. Ma nê hêrişanê dewleta Îranî yê vera hêzanê kurdan şermezar kenê. No nêzdîbîyayîşê dewleta Îranî do seba şaranê Îranî netîceyanê xiraban tede bîyaro û meseleyan giranêr bikero.
Dewleta Îranî ganî waştişê azadîye yê cinîyan û waştişê demokrasî yê şaranê Îranî bivîna, nê waştişan bîyara ca û seba çareserkerdişê meseleyan gaman bierza. Waştişê ke cinîyê kurdî û Îranî anê ziwan, waştişê demokratîk, meşrû û global ê. Nêno qebulkerdene ke waştişê cinîyan peygoş bibê û bi şîdetê bêrê mîyankerdene. Nêzbîyayîşê Îranî yo ke raştîya cinîyan nêvîneno, îradeyê cinîyan nêşinasneno û bi şîdetî mîyan keno nêno qebulkerdene. Ganî dewleta Îranî nê mezgî û fersetê serdestîya camêrdan ra fek vera bida û waştişanê cinîyan bîyara ca.
Dewleta Îranî çalakîyanê şarî tim sey kayê hêzanê teberî mojnena. Ganî Îran ney ra fek vera bida. Şar û komelê Îranî bi taybetî cinîyî wayîrê meseleyanê cidîyan ê. Ganî dewleta Îranî seba caardişê waştişanê şarî û cinîyan hînî gaman bierza. Seba çareserîya meseleyan zî girîng o ke rayîr û metodan, dîyalogan û pêkerdişî xo rê bikera esas, seba demokratîkbîyayîşî gaman bierza û meseleyan çareser bikera.
Dewleta Îranî zî û hêzê bînî zî zanenê ke têgêrayîşê azadîye yê kurdan tim vera mudaxeleyê hêzanê teberî werişto pay. Ma nê tewirê xo raşt vînenê û do tim wina bikerê. Seba ke verê mudaxeleyê hêzanê teberî bêro girewtene ganî dewleta Îranî waştişanê şarî bîyara ca, gamanê demokratîkan bierza.
Dewleta Îranî herinda ke kurdan sûcdar kena ganî seba çareserîya meseleya kurdan bixebita. Ganî meseleya kurdan bêra dîyene, qebulkerene û seba çareserîya ci gamî bêrê eştene. Meseleya kurdan têna yê Îranî nê meseleya pêro Rojhelatê Mîyanênî ya. Kam na mesele peygoş bikero do zerar bivîno. Coka hêrişê vera şar û hêzanê kurdan do Îranî rê fayde nêkerê. Ganî dewleta Îranî na raştîye bivîna, tewirê xo yê peygoşî ra fek vera bida, hêrişê vera şar, cinî û rêxistinanê kurdan cade vindarna.” BEHDÎNAN
