Hemserekîya Konseya Rayberdişî ya KCKyî bi eşkerayîyêke venga welatperweranê kurdan ê teberê welatî da ke weçînayîşanê 14ê gulane de, raya xo bidê.
Eşkerayîye wina ya:
”Serê esasê konseptê tasfîye û qirkerdişî de 24ê temmuza 2015î ra nata îqtîdarê AKP-MHPyî yo faşîst xîret kena ke pê metodanê şerê taybetî û şîdetî têgêrayîşê azadîye yê kurdan tasfîye bikero, destkewteyanê kurdan çin bikero û kurdan qir bikero. Rejîmê faşîstî seba ke pê xoverdayîşê gerîlayan nêeşka dest eşt çekanê kîmyewîyan, çekanê taktîkê nuklerî û çekanê qedexekerdeyan. Nînan reyde tecrîdê vera Rayber Apoyî zî ame girankerdene. Îqtîdarê AKP-MHPyî tedaya şaranê Tirkîya kerd, dewlete vurnaye sîstemê çete û mafyayan û Tirkîya vist mîyanê krîzan. Nika sey şarê kurdî şarê Tirkîya zî wazenê ke îqtîdarî ra bixelisê.
Têkoşînê şarê ma û têgêrayîşê ma îqtîdarê AKP-MHPyî yo faşîst berd verê rijîyayîşî. Îqtîdarê AKP-MHPyî vera têkoşînê ma bin kewt û her roje hîna zaf bin keweno. Bi rijîyayîşê nê îqtîdarî Kurdîstan û Tirkîya do bikewê prosesêkê neweyî. Coka weçînayîşê 14ê gulane zaf girîng ê. La no girêdayeyê têkoşînê şarî yê xurtî yo. Coka 14ê gulane seba ke nê îqtîdarê dişmenê kurdan ra bêro xelisnayene girîng o.
Sey şarê ma yê Tirkîya û Kurdîstanî ganî şarê ma yê teberê welatî zî girîngîye bido nê weçînayîşan û qetî şoro serê sindoqan û raya xo bido. Tarîxê têkoşînê ma de sere de Ewropa de şarê ma teberê welatî de paştî daye têkoşînî û her fedakarîye kerde. Ganî hol bêro famkerdene ke astêka nê têkoşînî ya girînge zî weçînayîş ê. Rayê şarê ma yê teberî tay nîyê. Rayê înan do netîceya weçînayîşan rê zaf tesîr bikerê. Coka ganî her kes teberê welatî de şoro sindoqan ser û seba ke AKP-MHP bin bikewo raya xo bido. Ganî şarê ma yê teberê welatî raydayîşî sey erkê xo bivîno.
Verê cû şarê ma zaf nêşibi serê sindoqan û raye nêdabî. No seba şarê ma kêmasîyêka pîl a. Senî kurdêk/e nêşino/a raya xo nêdano/a û paştî nêdano/a têkoşînê azadî û demokrasî yê welatî? Ganî şarê ma ney qebul nêkero. Şarê kurdî yê teberê welatî ganî rayêke zî kêm nêkero û bi xurtî tewrê weçînayîşî bibo, kêmasîya xo telafî bikero. Nê weçînayîşî weçînayîşanê bînan ra cîya yê. Ganî çew nêvajo ‘Teyna yew raya mi est a. Ez bida çi nêda çi.’ Rayêke zî zaf girîng a û ganî qet yew raye zayî nêba. Ma venga pêro welatperweranê kurdîstanijan ê teberê welatî danê ke şorê sindoqan ser û raya xo bidê.”
