Komîteya Têkilîyanê Teberî ya KCKyî derheqê îtîrafê Sersefîrê Bexdadî yê Tirkîya de eşkerayîyêke daye. Eşkerayîye wina ya:
“Sersefîrê Bexdadî yê Tirkîya Alî Riza Guneyî çend rojî verî Hewlêr zîyaret kerdbi û Mesrûr Barzanî û Mesûd Barzanîyî reyde pêvînayîş kerdbi. Nê pêvînayîşî ra dima rojnamegerêke derheqê qetilkerdişê Endama Merkezê Cigêrayîşî yê Jineolojî Nagîhan Akarsele de persêk persa.
Sersefîr Guney cewab da rojnamegere û vat ke Iraq de viraştişê bi desan baregehê Tirkîya dewam kenê û wina dewam kerd ‘Ma tay unsuranê Iraqî ra zêdeyêr giranîye danê serwerîya Iraqî ser.’
Sersefîrî qala pêvînayîşê bi Barzanîyan kerde û vat: ‘Mi pawitişê ma yê serê şerê ma yê vera PKKyî îfade kerdî. PKK û merkezê ci hedefê ma de yê.’ Bi nê hawayî Sersefîrî qirkerdişê verênî û ê Nagîhane Akarsel girewtî xo milî.
Xora zanîyena ke dewleta tirke teberanê sînorê xo de pê maffabîyayîş-çetebîyayîşê xo, binpaykerdişê qanûnan, rotişê madeyanê kundoxî, remnayîşê merdiman û qirkerdişê merdiman şinasîyena.
Sersefîrê Tirkîya bi wesfê xo yê fermîyî îtîraf kerd ke înan Iraq/Başûr de qirkerdişî kerdê û do bikerê. Na eşkerayîya ke pêvînayîşê bi Barzanîyan ra dima dîyaya, nîşaneya nasnêkerdişê heqanê serwerîya Iraq-Başûrê Kurdistanî ya û îlanê binpaykerdişê peymananê neteweyî û mîyanneteweyîyan o.
Sere de Neteweyê Yewbîyayeyî ganî hukmatê Bexdad û Hewlêrî, PDK, YNK, Goran û partîyê sîyasî yê bînî vera ney cade têbigêrê. Ganî parlamento, dezgehê komelê sivîlî, roşnvîr û şarê Başûrê Kurdistanî zî Sersefîr Alî Riza Guney sey Persona Non Grata (Keso ke nêwazîyeno) îlan bikerê. Bêvengîya vera ney yeno manaya paştdayîşî bi dewleta tirke û seyrkerdişê sûcanê ci.” BEHDÎNAN
