Hemserekîya Konseya Rayberdişî ya KCKyî derheqê pêvînayîşê bi Rayber Apoyî yo ke 23ê teşrîna verêne roja çarşemeyî ame kerdene, eşkerayîye daye û nê pare kerdî:
”Badê panc serran Rayber Apoyî reyde pêvînayîş ame kerdene ke no zaf muhîm o. Seba ke Rayber Apoyî ra xebere ameye girewtene ma, şarê ma û dostê ma bîyî şa. La senî ke Rayber Apoyî zî vat tecrîd nêameyo wedaritene, dewam keno.
Rayber Apoyî vat eke şertî bêrê pêardene o eşkeno semedê çareserkerdişê meseleya kurdan rol bigîro û zelal vist werte ke wazeno wezîfeyê xo yê tarîxî bîyaro ca. Ganî her kes nê hole fam bikero. Êyê ke semedê haştîya Tirkîya û çareserkedişê sîyasîyî yê mesele tewir ramojnenê, veng danê û paştî danê nê vengdayîşî ganî goş bidê vengê Rayber Apoyî. Semedê nê ganî hêver şertê weşî, asayîş û xebityayîşî yê Rayber Apoyî bêrê pêardene. Heta ke nê şertî nêrê caardene, şertê dîyalogî yê leazebe bi Rayber Apoyî nêrê pêardene, çew nêeşkeno Rayber Apoyî ra çîyêk bipawo. No pêvînayîş pozîtîf o la hema tecrîd dewam keno. Heta ke tecrîd bi temamî mêro wedaritene û şertê weşî, asayî û xebityayîşî yê Rayber Apoyî bêrê pêardene çew nêeşkeno avarşîyayîşî ra behs bikero.
Muxatabê çareserkerdişê meseleya kurdan Rayber Apo yo. Ma reyna vanê ke şarê kurdî pîya bi heme awanî û pabesteyanê xo proseso ke Rayber Apo do aver bêro, esas genê. Rayber Apo îradeyê têgêrayîş û şarê ma yo û muxatabê çareserkerdişê demokratîkî yê meseleya kurdan o. Na babete de qet fikr û nizdîbîyayîşo cîya çîn o. Têgêrayîşê ma do pîya bi pêro pabesteyanê xo goreyê prosesê ke Rayber Apo do aver bêro, têbigêro
Yeno vatene ke çalakîya Anqara hetê hêzanê ma ra ameya kerdene. Eke na çalakîye hetê hêzanê ma ra ameya kerdene HPG do eşkerayîya ke hewce kena, bikero. La senî ke yeno vatene eleqaya na çalakîye qetî bi nê prosesî çîn a. Na çalakîye kenê behene û hêrişê Rojawan, Şingal û Herêmanê Pawitişî yê Medya kenê ke no nîno qebulkerdene. Rojawan de hedefan cîya nêkenê, dewî, bajarî yenê pirodayene, şaro sîvîl yeno qetilkerdene. Xeylêk kesî ameyî qetilkerdene û bi desan kesî birîndar bîyî. No qirkerdiş o. Ma nê hêrişê elçexî şermezar kenê. Hetêkî ra qala çareserkerdişî kenê hetê bînî wina hêriş kenê. No paradoks o gird o.
Ganî şar û dostê ma goreyê na raştîye têbigêrê. Heta ewro her çî bi têkoşînî bi. Ewro ra tepîya zî têna bi têkoşînî ma eşkenê ser bikewê. Coka ganî ma têkoşînî esas bigîrê. Xora yeno zanayene ma wazenê meseleya kurdan wa bi dîyalog û muzakeran bêra çareserkerdene. Ganî ma semedê wedaritişê tecrîdî û azadîye fîzîkîye ya Rayber Apoyî têkoşînî xurtêr bikerê.”
