KCKyî da zanayene ke ê do seba îşxalî ra xelisnayîşê Efrînî berpirsîyarîya xo bica biyarê û waşt ke wa hemverê îşxalî de mucadele bêro xurtkerdene.
Hemserekîya Konseya Rayberdişî ya KCKyî bi wesîleya serrgêra îşxalê Efrînî eşkerayîyêka nuştekîye daye. Eşkerayîye ra tayî cayî wina yê: ”Dewleta Tirkî bi waştişê qirkerdişî hêrişê Efrînî kerd û vera naye şarê Efrînî xoverdayîşêko tarîxî ramot. 300 înan cinî, pîr, doman hezar şehîd dayî. Ma nê şehîdan bi vîr anê û vanê ke do Efrîn îşxalî ra bêro xelisnayene.
Efrîn de sucê qirkerdişî ame kerdene
Dewlata Tirkî verê çimanê dinya de demografîya Efrînî bedilnena û sucê qirkerdişî kena. Efrîno ke se ra 95ê ci Kurd bi nika se ra 15-20 Kurd mendî. No raştîya qirkerdişî ramojneno. Waxto ke dewleta Tirkî bi tankan topan şarê Efrînî qetil kerdêne Neteweyê Yewbîyayeyî, Yewîya Ewropa, Amerîka û Rûsya no qirkerdiş seyr kerdo û nê tewirê înan vernîya îşxalî akerdo. Rûsya bi destûrdayîşê sehayê teyareyanê xo nê sucî rê bîya şirîk.
Tirkîya dişmenê kurdan û demokrasî ya
Tirkîya bi îşxalê Efrînî reyna dişmenîya xo ya vera Kurdan û demokrasî ramojnayo. Tena Tirkîye de nê Rojakewtena mîyanêne de zî dişmenê demokrasî ya. Di hessesîyetê Tirkîye ye estî. Yewin dişmenîye estbîyayîş û azad ciwîyayîşê Kurdan. Dîyin zî hemverê demokrasî de ya. Her tim vera nînan hêriş kena. Îqtîdarê AKP-MHPyî yo ke Vakur de her roje hêrişê Kurdan û hêzanê demokrasî keno, nika zî Minbic û Vakurê Sûrîye de wazeno ke hêrişê sîtemê demokrasî bikero. Sey Efrînî tîya de zî wazenê ke çeteyanê xo ca bikerê û Kuran cayê ci ra vejî û faşîzmê xo ronê. Xoverdayîşê vera faşîzmê AKP-MHPyî xoverdayîşê merdimîye yo. Kurdî Vakurê Kurdistanî, Wareyanê Pawitişê Medya, Efrîn, Rojawan û Vakurê Sûrîye de bi nameyê merdimîye heta peynî do vera nînan xover bido.
Xoverdayîşê Efrînî xoverdayîşê namûsî yê heme Kuran o. Heta ke Efrîn mero xelisnayene, Kurdî do qet cayêk de rehet mekerê. Heme Kurdî ganî seba xelisnayîşê Efrînî berpirsîyarîya xo bica biyarê. Ma serrgêra yewine ya hêrişê Efrînî de xoverdayîşo girdî silam kenî û vanê ke ma do mucadeleyê xelisnayîşê Efrînî de berpirsîyarîya xo bica bîyarê û ganî vera îşxalî mucadele bêro xurtkerdene.” BEDÎNAN – ANF
