Hemserekîya Konseya Rayberdişî ya KCKyî derheqê netîceyanê weçînayîşanê 31ê adare de eşkerayîyêke daye. Eşkerayîye wina ya:
”Şarê ma weçînayîşanê 31ê adare de îradeyê xo mojna û serkewtişêko pîl vist destî. Ma nê serkewtişê tarîxîyî fîraz kenê.
Nê serkewtişê Vakurê Kurdîstanî pêro parçeyê Kurdîstanî şay kerdî û têkoşînê azadîye zixm kerd. Şarê ma nê prosesî de kedêka pîle daye. Ma şarê xo, dadîyan, ciwanan û cinîyan ê kurdan fîraz kenê. Dadîyanê kurdan bi nobetanê azadîye komel lerzna. Ma seba nê serkewtişî dadîyanê xo selam kenê. Ancî cinî û ciwanan bi tewirê xo kayê merkezê şerê taybetî pûç kerdî.
Şarê ma weçînayîşan de vera tecrîdê Îmraliyî, rejîmê qeyûman û polîtîkayanê înka û îmha yê îqtîdarî tewirêko zelal mojna. Îradeyê Newroze 31ê adare de xo eşkera kerd û şarê kurdî vat ke do rayîr nêdo faşîzm û tecrîdî. Îqtîdarê AKP-MHPyî şarê kurdî û şaranê bînan ra lapatêk werd. Ferasetê netewe-dewlete nê weçînayîşan de bin kewt, wayûbiratîya şaran û ferasetê netewe-dewlete ser kewtî. No serkewtiş zî serkewtiş têkoşînê hemparî yê kurdan ê bi şaran o. Hetê bînî ra nê netîceyan venga pêro hêzanê demokrasî û azadîye da ke yew û îtîfaqanê xo aver berê.
Bêguman nê weçînayîşî bi hawayêkê demokratîkî nêqewimîyayî. Bi taybetî Kurdîstan de antîdemokratîk bîyî. Xora Kurdîstab new serrî yo binê mufetîşanê kolonyalîzmî de yeno îradekrdene.Qeyûmî teyna parçeyêkê ney ê. Kurdîstan de nika rewşêka faşîste ya sîyasîye est a. Bi des hezaran polîs, memur, leşker ûsn kirişîyayî Kurdîstanî û înan sey weçînitoxan raye daye. Rixmê nê kerdişan zî Kurdîstanî serkewtişêko bêhempa vist destî. Kurdîstan de sere de Şirnex, qezayê Colemêrgî, Qers, Bedlîs, Çewlîg cayê ke AKP-MHPyî rê nusîyayê ameyî xespkerdene. Şarê kurdî qetî ney qebul nêkeno.
Wa her kes tewir, rol û serkewtişê weçînayîşan ê şarê kurdî hol fam bikero. Îqtîdarê faşîstî bi taybetî nê 22 serran de Tirkîya arda verê felaketan û xizanîye. Tirkîya kerda wareyê mafya, çete û dizdan. Şarê kurdî û têgêrayîşê azadîye vera nê ferasetê faşîstî têkoşîn kenê. Ma wina bawer kenê ke nê prosesî de girîngîya şarê kurdî hol fam bîya. Nê prosesî de îqtîdarê AKP-MHPyî amadekarîya ci keno ke hêrişanê neweyan bikero û şerê vera kurdan xorinêr bikero. La ganî şer nêro xorinkerdene, meseleya kurdan bi demokrasîyî bêra çareserkerdene. Şarê kurdî Newroze de bi zelalî vat ke wa cade tecrîd wedarîyo, Rayber Apo azad bibo û bibo muxatabê çareserîye. Ganî her kes goreyê nê îradeyê şarê kurdî têbigêro.
Ma venga hêzan û dewletanê mîyanneteweyîyan zî danê ke wa paştî nêdê şerê AKP-MHPyî û goreyê îradeyê şarê kurdî têbigêrê.
Ma ancî serkewtişê şarê xo yê Vakurê Kurdîstanî fîraz kenê.”
