Hemserekîya Konseya Rayberdişî ya KCKyî bi wesîleya serrgêra Qirkerdişê Helebçe yê 16ê adara 1988î eşkerayîyêke daye û şehîdê Helebçeyî yad kerdî.
Eşkerayîye wina ya:
”Hêzanê qirkerean û kolonyalîstan vera kurdan 16ê adara 1988î de Qirkerdişê Helebçe kerdbî. Ma kerdoxê nê qirkerdişî rejîmê Saddamî yê faşîstî bi şîdetî şermezar kenê û şehîdanê Helebçeyî bi rêzî yad kenê. Ma şexsê şehîdanê Helebçeyî de pêro şehîdanê ma bi minet û rêzî yad kenê. Ma ancî soz danê ke xeyalanê şehîdanê xo bîyarê ca û hesabê qirkerdişan bipersê.
Qirkerdişê Helebçe qirkerdişanê tarîxî yê tewr wehşî û dejînan ra yew o. Qirkerdişê Helebçeyî mojna ke hişmendîya neteweperest, nîjadperest û dewleta netewe çend wehşî, zalim û bitehluke ya û dişmenîya înan a vera kurdan zî xorin a.
Helebçe de bi hezaran kurdî, cinîyî, domanî û kokimî bi çekanê kîmyewîyan ameyî qetilkerdene. No qirkerdiş verê çimanê dinya de ame kerdene û qet yew dewlete verê ci nêvejîya. Amerîka, Ewropa, Neteweyê Yewbîyayeyî ûsn. verê nê qirkerdişî de bêvenh mendî.Hêzê kapîtalîzmê modernî hemkarê nê qirkerdişî yê. Qirkerdişê kurdan netîceya sîyasetê parkerdişê Kurdîstanî û nêçareserkerdişê meseleya kurdan ê hêzanê kapîtalîstan o. Ewro zî hêzê kapîtalîstî benê hemkarê qirkerdişê kurdan. Nê hêzî destek danê ke dewleta tirke Vakur de polîtîkayanê qirkeran bikera, Rojawan û Başûrî îşxal bikera û hêrişê Şingal û Mexmûrî bikera. Destekê bi AKP-MHPyî raşta raşte destekê bi qirkerdişê kurdan o.
Ganî prosesê Qirkerdişê Helebçe hol fam bibo. Ganî sîyasetmedar, roşnvîr û nuştoxê kurdî naye ser de vinderê û raştîyan eşkera bikerê.
Dewleta Iraqî dima ke verê têkoşînê kurdan de bin kewt 1983 de YNKyî de pêkerd ke bi xoserîya Başûrî meseleya kurdan bêra çareserkerdene. La dewleta tirke xo kerd mîyan û no pêkerdiş herimna. Dewleta Iraqî no sebeb Celal Talabanîyî rê bi zelalî vat naye ser o Celal Talabanîyo rehmetî agêrabi Başûrê Kurdîstanî. Nê tarîxî ra dima Saddamî bi destekê dewleta tirke verê xo da kurdan, bi Hereketê Enfalî dest bi qirkerdişan kerd û Qirkerdişê Helebçe zî na çarçewe de kerd. Ganî na raştîyî bizanîyê ke verê qirkerdişanê kurdan bêro girewtene.
Ewro zî vera şarê Kurdîstanî qirkerdişî dewam kenê. Ewro zî nameyê dewleta tirke ser o Erdogan na polîtîka ano ca. Dewleta tirke û rejîmê Erdoganî yo faşîst nêwazenê meseleya kurdan çareser biba û çareserîye bi gef, îşxal û hêrişan asteng kenê. Seke o çax Iraq de kerdbi ewro zî dewleta tirke Sûrîye de wazena heman çî bikera û nêverdena ke mabênê dewleta Sûrîye û kurdan hol biba. Dewleta tirke nêçareserkerdişê meseleya kurdan, qirkerdişê kurdan ferz kena.
Ma serrgêra 36. de ancî şehîdanê Helebçe yad kenê. Ganî ma sebebê raştîyanê tarîxîyan ê nê qirkerdişî hol fam bikerê, yewîya xo ya neteweyî bihêz bikerê û vera dişmenê qirkerî hîna bi tesîrî têkoşîn bikerê.”
