Nê şerê 9 mengan ê Herêmanê Pawitişî yê Medya de tunelê şerî yê Şehîd Botanî çeperanê tewr girîngan ra yê. Menga kanûne de 150 reyî bi çekanê kîmyewîyan hêrişê nê çeperê xoverdayîşî ame kerdene. Rixmê nê hêrişan zî komêka gerîlayan çeperê xo pawit, artêşa tirke teng kerde.
Hemleya Şorişgêre ya Bazanê Zagrosî de xeylêk qehremanîyî qewimîyayî. Menganê verênan ê nê şerî de şer bi giranî Zap û Avaşîn de qewimîya, menga temmuze de şer resa warê Çemçoyî. Girê stratejîkî yê Şehîd Adil, Çemço, Şehîd Fedakarî yê waranê Çemço û Sîda, roja verêne ya şerî ra nata seba koordînekerdişê şerî giranê Şehîd Şahîn, Werxelê û Karkerî de caardişê çalakîyan de wayîrê rolêkê pîlî bîyî. Gerîlayanê Çemço û Sîda bi çalakîyanê xo embazê xo yê giranê Zap û Avaşînî teyna nêverdayî. Afernayoxanê xoverdayîşê Zap û Avaşînî ra êyê tewr girîngî Girê Çemço û Sîda bîyî. Artêşa îşxalkere seba ke verê înan bigêrê temmuze d eoperasyonêkê îşxalî vera nê waran da destpêkerdene. Tunelanê şerî yê Çemço, Şehîd Fedakar, Şehîd Adil û Şehîd Botanî bi mengan, bi hawayêkê destanwarîyî xo ver da.
Artêşa tirke temmuze de bi pêro îmkan û teknîkê xo hêrişê tunelanê şerî yê Şehîd Botanî yê Girê Şehîd Adilî yê Çemçoyî kerd. Artêşa îşxalkere bi helîkopteranê Skosrkyî bi rojan xîret kerd ke hêzê xo serê girî de bîyara war la nêeşkaye. Naye ra dima artêşa îşxalkere kerd ke erdî ra leşkeranê xo bîyara war. Menga temmuze de mabênê gerîlayanê Şehîd Botanî û îşxalkeran de şerêko giran qewimîya. Nê cayî de bi desan îşxalkerî ameyî cezakerdene û 2 rojan ra dima artêşa îşxalkere remaye û Girê Şehîd Adilî de xo nimit. La gerîlayan nêverda ke artêşa îşxalkere tîya de zî cabiba.
Tunelê Şehîd Botanî seba temamkerdişê îşxalê Zagrosî artêşa îşxalkere rê çeperêko tewr girîng bi. Coka artêşa îşxalkere menga tebaxe de reyna verê xo da tîya. Tebaxe ra nata nê tunelanê şerî yê Şehîd Botanî de xoverdayîş dewam keno.
Gerîlayê tunelanê şerî yê Şehîd Botanî roja verêne ra bîyî afernayoxê xoverdayîşê destanwarîyî. No xoverdayîşo ke binê hêrişanê gazanê kîmyewîyan de ameyêne kerdene, îradeyê Apogîrî yê gerîlayan mojneno ra ke do bin nêkewo.
Gerîlayê ke çar mengî yo her roje, her saete gazê kîmyewî vera înan şuxilîyayêne, înanreyêke zî embazanê xo rê nêvat ‘Ma teng bîyê’ yan zî ‘Ma çeperê xo teriknenê.’ Bi îmkananê qijan înan derbî dayî artêşa tirke ya îşxalkere ro.
Xoverdayîşo destanwarî tunelanê şerî yê Şehîd Botanî de 9 mengî yo dewam keno. Binê nê hêrişanê gazanê kîmyewîyan û teqaberanê qedexekerdeyan de gerîlayî bi îradeyê felsefeya Apogîran 9 mengî yo xo ver danê û kokê leşker û cerganê artêşa tirke anê. BEHDÎNAN
