Kêliyên ku çeteyên DAIŞ’ê li kampa xwe ya li Baxozê teslîm dibin, hatin kişandin. Di dîmenan de xuya dibe ku çeteyên DAIŞ’ê di bin alên YPG û YPJ’ê de kom bi kom teslîm dibin û li kamyonan tên siwarkirin
Operasyona Hêzên Sûriyeya Demokratîk (HSD) ên li dijî DAIŞ’ê yên li gundê Baxoz ê bajaroka Hecîn ê Dêrazorê berdewam e. Hejmara çeteyên DAIŞ’ê û malbatên wan ên di demên dawî de teslîmî HSD’ê bûn, 7 hezar derbas kir. Li Dêrazora ku DAIŞ’iyên ji hemû welatan derketin holê, xîlafeta selefiyan saetên xwe yên dawî dijî. Li Dêrazora ku kêliyên dîrokî tên jiyîn, DAIŞ li qadekî pir biçûk de tengijî ye.
Qada ku sivîl bi komî jê tên derxistin li ser Çemê Firatê cih digire û DAIŞ vê derê weke kampê bikartîne. Li qada ku ji aliyê şervanên HSD’ê ve hatiye dorpêçkirin, hîn jî liv û tevgera sivîlan lê heye. Kêliyên ku çeteyên DAIŞ’ê teslîm dibin û li kamyonan tên siwarkirin, ketin ber objektîfa Ajansa Mezopotamyayê (MA). Kampa ku ji hêla şervanên HSD’ê ve hatiye dorpêçkirin, DAIŞ’î û malbatên wan pir baş xuya dikin.
Bi kamyonan tên veguhestin
Di heman demê de sivîlên ku weke mertalan zindî tên bikaranîn jî dikevin ber kamerayan. Her wiha DAIŞ’iyên teslîm bûyîn û li wesayîtan tên sîwar kirin jî xuya dikin. Li cihê Ebû Kemal ê di destê rejîma Sûriyeyê de jî, bi sedan wesayîtên kom bûyîn xuya dikin. Operasyonên hêzên HSD’ê yên kozikên DAIŞ’ê berdewam dikin.
Di bin alên YPG û YPJ’ê de teslîm dibin
Dêrazor a xwedî erdnîgariyeke deşte, gireke nêzî gundê Baxozê heye. Li ser gir alên YPG û YPJ’ê li ba dibin. DAIŞ’î dibin van alan de teslîmî hêzên YPJ û YPG’ê dibin. Kêliyên dîrokî yên bi wêne û dîmenan tên kişandin, DAIŞ’iyên teslîm dibin, li kamyonan tên siwarkirin û ji bo cihên cuda tên şandin. Hemû jin, zarok û zilam di 2 noqteyên lêgerînê de derbas dibin. DÊRAZOR
