Kurdistan de rayîrê micadeleyî tu wext kêmî nêbenî. Her tim bi rayîrêko cîya Kurdî micadeleyê xo domnenî. Çar perçeyan de teda û zilmî her tim bibî labelê rewşa ke nika Bakurê Kurdistanî tede ya, her wextan ra cîya ya. Nê çar serranê peyênan de ne şaristanî ne zî koyî; qet û qet rojêka normale nêdîyê. Şerêko tewr xerîb o ke nika nameyê ci kerdî ‘şero asîmetrîk’ dewam keno û mîyanê nê şerî de her tewir hêrişî benî. Başûrî ra heta Bakur, Rojhelatî ra heta Rojawanî; Tirkîye çim eşta nê heme perçeyan û bi cîya cîya metodan şerê xo yê asîmetrîkî domnena.
Bakurê Kurdistanî de eynî polîtîka, hêna eynî metodan ser o virazîyena û Kurdî her çendêk vera na polîtîka de micadele bikerî zî encam nêbedelyeno. Nameyê a polîtîka; polîtîkaya qeyûmî ya. Qeyûmî 2016î ra nata bîyê belayê sereyê Kurdan. Hêzê mîyanneteweyî her çendêk na polîtîka rexne bikerî zî Dewleta Tirkî qet peyser game nêerzena. Heta şaredarîyê di qeza û hîrê şaristananê girdan rê qeyûm teyîn bîyê. Û wina aseno ke do teyînkerdişê qeyûman dewam bikero.
Polîtîkaya bîne ya ke serranê 90an ra nata esta û en peynî 2009î de virazîya; padayîşê partîyanê sîyasîyan o. Heta nika gelek partîyê sîyasî yê Kurdan hetê dewlete ra ameyî padayene. HEP, OZDEP, DEP, HADEP û DTP… Nê partîyî raştê bêhiqûqîyanê dewlete ameyê û heme zî demo ke sewîyeya şerî bîya berze, ameyê padayene. Nika eynî polîtîka seba HDPyî kewena felîyet û dewlete wazena sey aqûbetê HDPyî zî sey nê partîyan bo. Îdarekarê dewlete her roje seba ke bingehê na polîtîka debikî, beyanatan danî û xura çalakîya verê berê HDPyî zî seba na polîtîka ya.
Padayîşê HDPyî karê dewlete hêna kena asan. Dewlete seba ke qeyûman teyîn bikera, gere heme hemşaredaran ra dewa abika û bingehê nê dewayan zî debika; labelê eke partî bêra padayene hewce nêkeno ke heme hemşaredaran ra dewa bêra akerdene û qeyûmî bi no qeyde bêrî teyînkerdene. Yanî esasê xo de dewlete bi padayîşê HDPyî wazena gelek çiyan pîya bika.
Waştişê dewlete xura esasê polîtîkaya ci yo. Derdê înan tena padayîşê partî ney gelek çiyê bînî yo zî. Çalakîya verê berê HDPyî hem Hereketa Azadîye ya Kurdan hem zî sîyasetê aye hedef gêna. Na çalakî wazena micadeleyê Kurdan o ke şeref û namusê heme Kurdan o pûç bivejo û şervananê Kurdan ê ke canê xo seba şarê xo feda kenî bê îrade biverdo. Seba na çalakîye hetê îdarekar û fermandaranê PKK û HPGyî ra beyanatî ameyê dayene. Nê beyanatan de veng dîya keyayanê ke çalakîye de yî û keyeyî ameyî îqazkerdene.
Vera polîtîkayanê dewlete de karê esasî xo pêtkerdiş û lingan ser de vindertiş o. Çi beno wa bibo gere waştişê dewlete nêro ca û vera dewlete de peyser game nêra eştene. Ê çendêk biwazî vernîya sîyasetî bigîrî zî gere Kurdî û dostanê Kurdan cayê xo de nêvinderî û mîyanê şaran de micadeleyî rêxistin bikerî.
