Kesê ke tewrê 19. Festîvala Kultur û Xoza ya Mûnzûrî ya Dêrsimî bîyî reaksîyon nîşanê qerarê walîtî yê qedexekerdişê programê kulturî dayî. Serekê DEDEFî Ali Haydar Benî derheqê babete de dîyar kerd ke kesêk nêeşkeno nameyê komelî ser qerarêk bido û waşt ke şert û mercê demokratîkî bêrî awankerdene
Komîteya Amadekar ya Festîvala Kultur û Xoza ya Mûnzûrî ya Dêrsimî derheqê qerarê walîtîya Dêrsimî yê qedexekerdişê programê belgefîlmê ‘Dayîkê Şeme’ û atolyeya LGBTÎyî de eşkerayîyêk daye çapemenî. Komîte verê awanîya Şaredarî de eşkerayî daye. Kombîyayîş de parlementerê Partîya Demokratîke ya Şaran (HDP) yê Stenbolê Dilşat Canbaz, Dayîkê Şeme, Keyeyê Pirsûsî, Keyeyê 10ê Teşrîna Verêne, Şaredarê Dêrsimî Mehmet Maçoglû û xeylê hemwelatijî hadre bî.
Ganî her şar û bawerî bieşko xo bîyarî ziwan ser
Nameyê komîteya amadekar ser Serekê Federasyonê Komeleyanê Dêrsimî (DEDEF) Ali Haydar Benî reaksîyon nîşanê qerarê qedexekerdişî yê Walîtîya Dêrsimî da û wina va: “Bi serran o Dayîkê Şeme Raşteyê Galatasarayî de çalakî virazenî. Nika zî verê ÎHDyî de çalakîya xo domnenî. Tu heqê kesêk çin o ke nameyê komelî ser qerarêk bido. Ganî her şar û bawerî bieşko xo bîyarî ziwan ser.”
Ma kerdoxan baş zanî
Keyeyê 10ê Teşrîna Verêne ra Erdogan Tedîkî zî ard ziwan ke do çalakîyanê xo dewambikerî û va: “Ma soz da merdimanê xo yê ke cuya xo vindî kerdî. Ma înan xo vîra nêkenî û nêdanî vîrakerdene. Ma 5ê hezîrane de Amed, Pirsûs û Anqara de parçeyê domananêxo vera da. Ma êdî nêtersenî. Ma kerdoxan baş zanî. Ma heta ke kerdox bêrî vînayene û bêrî muhakemekerdene fek têkoşînê xo ra vera nêdanî.”
Qetlîyamê ke pê ameyî birînê komelî yî
Nameyê Keyeyê Pirsûsî ser zî Fethi Aydinî qiseykerd û va: “Qetlîyamê ke pê ameyî birînê komelî yî. Ma do Amed, Pirsûs, Anqara û her ca de seba vînayîşê vindîbîyayeyan û muhakemekerdişê kerdoxan têkoşîn bikerî. Ma do 20ê aşme de Raşteyê Kadikoyî de çalakî virazî.”
Heme dayîkî seba vindîbîyayeyan yenî têhet û benî yew
Dayîka Şeme Masîde Ocake arde ziwan ke ê 24 serrî yoke seba vînayîşê vindîbîyayeyan û muhakemekerdişê kerdoxan têkoşîn danî û va: “Bawerîya heme Dayîkanê Şemeyan yewbînan ra esta. Heme dayîkî seba vindîbîyayeyan yenî têhet û benî yew. Ewja de heme bawerîyê cîya-cîyayî estî. Goreyê qanûnê bingeyî û pêkerdişê mîyanneteweyîno heqê ma yo.”
Ocake tewr peynî way û birayê yewbînan yê domanê bi nameyê Ayaz (8) û Nupelda (4) yê ke qezaya Pulurî ya Dêrsimî de bi muhîmatêko leşkerî cuya xo vindî kerdî vîr arde. DÊRSIM
