Platforma KESK’ê ya Amedê li dijî qeyûm û KHK’iyan daxuyanî da. Di daxuyaniyê de hat gotin ku yek armanca qeyûman heye ew jî rantê ji AKP’iyan û rêxistinên nêzî xwe belav kirin e
Platforma KESK’ê ya Amedê têkildarî tayînkirina qeyûman û karmendên bi KHK’iyan hatin îxrackirin li Kuçeya Hunerê ya Ofîsa Amedê daxuyaniya çapemeniyê lidar xist. Hevserokê KESK’ê Mehmet Bozgeyîk, rêveberên navenda KESK’ê, Serokê TUMBEL-SEN’ê Erdal Bozkurt û rêveberên KESK’ê beşdarî daxuyaniyê bûn û pankarta ‘Em destwerdana li dijî îradeya gel qebûl nakin’ vekirin. Li ser navê KESK’ê Erdal Bozkurt daxuyanî da.
Bozkurt tayînkirina qeyûmên bo şaredariyên HDP’ê bi bîr xist û wiha got: “Pêvajoya tayînkirina qeyûman didome. Îktîdar bi polîtîkaya qeyûman dixwaze tola xwe ji gel hilde û dixwaze di şexsê hilbêjiran de gel ceza bike. Li ser fermana Wezîrê Karê Hundir qeyûm tê tayînkirin. Lê gel qeyûman qebûl nake û pê qanih nebûye. Tekane armanca van mudaxeleyên antî demokratîk heye ew jî AKP dixwaze şaredariyê ji gel veqetîne û ji nûve talan bike, dixwazin bi rêbaza qeyûman ji xwe re qesrên biçûk çê bikin û rantê li AKP’iyan û rêxistinên nêzî xwe belav bikin. Em dixwazin dawî li vê polîtîkayê were anîn.”
‘Hezar û 500 hevalên me ji kar hatin derxistin’
Bozkurt bal kişand ser dema qeyûmên serdama bihûrî û got ku bi hezar û 500 endamên sendîkaya wan bêyî tu hinceta hiqûqî were nîşandan ji kar hatin avêtin û da zanîn ku armanca van polîtîkayên AKP’ê ew e ku her deverê bi xwe ve gire bide û li gorî xwe biryarê bide.
‘AKP welat bi darveyan bi rêve dibe’
Piştî Bozkurt, hevserokê KESK’ê Mehmet Bozgeyîk jî axaftinek kurt kir û gotinên AKP’ê yên dema nû hat ser îktîdarê bi bîr xist û got ku di pêvajoya niha de AKP welat bi OHAL, KHK’iyan, qeyûman û darbeyên sivîl û siyasî birêve dibe.
Bozgeyîk diyar kir ku divê endam û rêveberên şaxên wan ên hatin îxrackirin demildest vegerin karê xwe û ew ê bi baweriya aştî û demokrasiyê têkoşîna xwe bidomînin. AMED
