KESK, DÎSK, TTB û TMMOB bi eşkerayîyêka hempar tayînkerdişê qayûman şermizar kerdî û vatî: “Tayînkerdişê qayûman yeno manaya cînayetê demokrasî. Ganî hemşaredarê Wan, Amed û Mêrdinî agêrî karê xo ser.”
Konfederasyonê Sendîkaya Kedkaranê Rayapêroyî (KESK), Konfederasyonê Sendîkaya Karkeranê Şorişgêrî (DÎSK), Yewîya Tabîbanê Tirkî (TTB) û Yewîya Odeyê Muhendis û Mîmaranê Tirkî (TMMOB) bi eşkerayîyêka hempar tayînkerdişê qayûman yê Şaredarîyanê Bajaranê Girdan yê Amed, Wan û Mêrdînî şermizar kerdî.
Eşkerayîya nuştekî bi sernameyê ‘Welato ke qayûm tede bibo de qala demokrasî nîno kerdene’ ame weşênayene. Eşkerayîye de ame vatene ke ganî bi hawayo lez fek darbeya sivîlî ra bêra veradayene û wina dewam kerde: “Hemşaredarê Wan, Amed û Mêrdinî tepîya agêrêne karê xo ser. Hemşaredarî bi rayanê mîlyonan kesan ameyî weçînayene. La kesê ke ameyî weçînayene hetê Wezîrîya Karê Zerre ra wezîfe ra ameyî girewtene. Tayînkerdişê qayûman yeno manaya cînayetê demokrasî. Vatişê Wezîrîya Karê Zerre zî yenî manaya derbeya sîyasî.”
Eşkerayîye de ame dîyarkerdene ke zîhnîyetê qayûmî her raşteyê cuye de vejîyeno vernîya şarî û eşkerayî wina qedîya: “Qayûm tena tayînê şaredarîyan nînê kerdene. Vera raşteyê ke têkoşîn tede yenî kerdene de zî qayûm yenî tayînkerdene. Kocaelîye de hemverê karkeran û Anqara de zî hemverê kedkaran de qayûm yenî tayînkerdene. Ma veng danî û vajî ke teberê huqûqî tênêgêrayêne. Ma vanê ke ganî hemşaredar Bedîana Ozgokçe Ertan, Adnan Selçuk Mizrakli û Ahmet Turkî reyna tepîya agêrî karê xo ser.” ANQARA
