Grûbêka kanperest sahaya hemverê camî de domanê kênayan ke futbol kaykerdêne hedef nîşan dabî
Grûbêka kanperest û endamê Huda-parî şexsîyeto bi nameyê Omer Aşkinî ke bi nizdîbîyayîşê xo yê hîzbullahî yeno zanayene înternet ser o ra sahaya hemverê camî de domanê kênayan ke futbol kaykerdêne hedef nîşan dabî. Badê ke nê dîmenî kewtî medyaya komelkî ser her beşê komelî û rêxistinê cinîyan ra reaksîyonî ameyî mojnayene.
Derheqê babete de Baroya Amedî ya Merkezê Heqê Domanan kesê ke domanê kênayan hedef nîşan dayî gereyê dozgerî kerde.
Baroya Amedî eşkerayîya xo ya nuştekî ya perê de wina va: “Ma kesê ke domanê kênayan ke futbol kaykerdêne û înan hedef nîşan dabî de tehqîqat da destpêkerdene û çarçeweya tehqîqatî de keso şikin seba îfadedayîşî ame vendayîş. Ma do taqîpkarê prosesî bibî.” ÇEWLÎG
