Keyeyê Ayşe Başarane badê ke cenaze qezaya Tetwanî ra girewt, ard qezaya Farqînî ya Amedî û binê ablûqaya eskeran de cenaze defin kerd
Dewa Cengiza ya qezaya Tetwanî ya Bedlîsî de 27ê temmuza de operasyona hewayî virazîyabî û netîceyê operasyonî de 3 endamê HPGyî cuya xo vindî kerdbî. Înan ra yew zî endama HPGyî Ayşe Başarane bîye. Keyeyê Ayşe Başarane cenaze qezaya Tetwanî ra girewt û ard qezaya Farqînî ya Amedî. Keye badê ke cenaze Tetwanî ra girewt, dewa Etşa ya qezaya Farqînî ya Amedî de binê ablûqaya eskeran de cenaze defin kerd. Eskeran dormeyê dewe girewtî binê ablûqa û dekewtiş û vejîyayîşê dewe kerdî binê kontrol. Eskeran destûr nêda ke keyeyê şînî bêro akerdene. Keye keyeyê xo de şînê xo rona û serweşîyan keyeyê xo de qebûl keno. AMED
