Xeylê bajaranê başûrê Kurdistan û Tirkîye de hemwelatijî badê nimajê roşanî şîyî zîyaretê mezelanê kesê ke rayîrê azadîye û demokrasîye de cuya xo vindî kerdî
Xeylê bajaranê başûrê Kurdistan û Tirkîye de hemwelatijî badê nimajê roşanî şîyî zîyaretê mezelanê şehîdan. Temsîlkarê partîyê sîyasî, rêxistinê komelkî yê sivîl, sîyasetmedarê kurd û keyeyî şîyî zîyaretê mezelanê kesê ke rayîrê azadîye û demokrasîye de cuya xo vindî kerdî, dua û umidê çareserîya demokatîke kerdî. qiseykerdişê ke mezelan ser de ameyî kerdene de ame vatene ke kesê ke seba şarê kurd cuya xo vindî kerdî erjê înan î.
Şirnex, Wan û Colemêrgî de mezelê kesê ke prosesê qedexeyê tebervejîyayîşç kuçeyan de cuya xo vindî kerdî, ameyî zîyaretkerdene. Mezelan ser de dua ameyî kerdene û demê hîssin ameyî cuyayene. Badê zîyaretê mezelan sîyasetmedar û temsîlkarê rêxistinê sivîlî roşanê keyeyan binbarek kerdî. keye û sîyasetmedarî umidê rojanê azadî û aştîye kerdî.
Stenbol de zî mezelê kesê ke cuya xo mîyanê têkoşînê azadîye û demokrasîye de vindî kerdî, ameyî zîyaretkerdene. Dayîkê kesê ke cuya xo vindî kerdî, saetanê serê sibayî de şîyî mezelan ser û domananê xo zîyaret kerdî. Keyeyan Goristananê Sûltangazî, Ihlamûrkoyu yê Umraniyê, Kanarya yê Kuçukçekmece û Kayabaşi yê Arnavûtkoyî de mezelanê domananê xo ser de duayan kerdî.
