Wendekara Unîversîteya Munzurî Gulîstan Dokuye Dêrsim de 5ê çeleyê 2020î ra nata vînîbîyaye ya. Keyeyê Dokuye seba ke aqîbetê kênaya xo bimuso Dêrsim de ‘Nobeta Edaletî’ dabî destpêkerdene. Keyeyî bire daye ke Anqara de verê Meclîsî de çalakîya xo rê dewam bikero. Keye şewe resa Anqara.
Keyeyî serê sibayî waşt verê Meclîsî de eşkerayîyêke bido la polîsan keyeyî rê mudaxele kerd û nêverda ke keye eşkerayîye bido. Keyeyê Dokuye vera polîsan nêrazîbîyayîşê xo mojna û kewt Meclîs.
Dadîya Gulîstane Bedrîye, babî Halît û waka ci Aygul Dokuye Grûba HDPyî zîyaret kerde û Hemsereka Partîya Demokratîke ya Şaran (HDP) Pervîn Buldane reyde pêvînayîşêk kerd. Serekwekîlê Grûba HDPyî Saruhan Oluç û Meral Daniş Beştaşe zî tewrê pêvînayîşî bîyî.
Dadîye Bedrîye Dokuye pêvînayîş de bi kurmanckî qisey kerd û vat: ”Înan sanîye bi sanîye Gulîstana mi kişte. Merg emrê Homayî yo, gorê her kesî esto. Mergê ciwanan giran o. Çi yo ameyo ma ser.”
Aygul Dokuye nameyê keyeyî ser o dosyayêke daye HDPyî û waştişê înan ardî ziwan. Pêvînayîş de Pervîn Buldanw zî îfade kerd ke ê tim hetê keyeyê Gulîstan Dokuyw de yê.
Keyeyê Dokuyî pêvînayîşî ra dima do tewrê kombîyayîşê Grûba CHPyî bibo. ANQARA
