Dîya zanayene ke Mehmet Sevînço ke 28 serrî yo tepişteyo Zîndanê Akhîsarî yê Manîsa de 3ê nîsane de şewe saete 3 de koxûş de gonîye şîya mezgê ci û wedarîya servîsê lezabezî yê Nêweşxaneyê Dewlete yê Mustafa Kîrazogluyî.
Dima ke Sevînç ame amelîyetkerdene xebere dîyaye keyeyê ci. Îdareyê zîndanî keyeyî rê vat ke serê sibayî gardîyanan taşte berda Sevînçî û dî ke hîşê ey şîyo. La keye musa ke qeydê nêweşxaneyî şewe saete 03.50 de ameyo kerdene.
Sevînç nika beşê ciewnîyayîşê giranî de yo û rewşa ci xirab a. Kênaya Sevînçî Bêrîvane Sevînç îfade kerd ke serebût şikdar o û vat: ”Servîsê lezabezî de çewî ma rê çîyêk nêvat. Doktorêkî ma rê vat ke gonîye şîya mezgê ey. Dima ma şîyê hetê doktoro ke babîyê mi amelîyet kerdo. Ê doktorî ma rê vat ke babîyê mi ya ginayo erdî ro yan zî derbe werdo. Ma persayî ke rêçê derbe est o yan nê. Ey vat ‘Ma nêeşkenê gonîye vindarnê.’ Seba ke leşkeran ma oda ra vetî, ez nêeşkaya bivîna ke rêçê derbe est o yan nê. Leşkeran nêverda ke doktor ma rê agahîye bido.”
Bêrîvane Sevînç ard ziwan ke no serebût şikdar o û agahîyê ke dîyayê keyeyî yewbînan nêtepişenê. MANÎSA
