Keyeyê wendekarê Mektebê Hêzê Hewayî ke tepişte seba caardişê edaletî verê awanîya Rêxistina Stenbolî ya AKPyî de dest bi çalakîya roniştişî kerdî
Keyeyê wendekarê Mektebê Hêzê Hewayî ke hewldayîşê derbeya 15ê temmuza 2016î de ameybî tepiştene, seba caardişê edaletî verê awanîya Rêxistina Stenbolî ya AKPyî de dest bi çalakîya roniştişî kerdî. Keye Stenbol, Kayserî û Denîzlî ra ameyî û verê AKPyî de kom bîyî. Keyeyan dîyar kerdî ke heta ke ê netîce nêgîrî çalakîya xo ra fek vera nêdanî.
Polîsan verê awanîya AKPyî de tedbîr girewtî û destûr nêdayî ke şêrî awanî. Dima ra keyeyan teberê barîyeran de dest bi çalakîya roniştişî kerdî. Polîsan destûr nêdayî ke rojnamegerî vîdeo û fotografan biancî û polîsan rojnamegeran cahê çalakîye ra dûrî kerdî.
Tay keyeyî medyaya sosyalî de vîdeo û fotografan pare kerdî û waştişê xo wina ardî ziwan ser: “Ma asin eşt tîya. Heta ke edalet nêro caardene, ma tîya de yî. Wa Serekkomar vengê ma bieşnawo. Tu sucê domananê ma çin o.”
Ma çalakîya xo ra fek vera nêdanî
Ayten Guleşçî ya 47 serrî ke Denîzlîye ra şîya Stenbolî va: “Lajê mi Yasîn Guleşçî yo 25 serrî 4 serrî yo tepişte yo. Ma paweyê edalaletî yî. Cezaya muebetî dayî lajê mi ro. Ez tena lajê xo wazena. Ma azadîya domananê xo wazenî. Heta ke ma selahîyetdaran reyde pêvînayîş nêkerî, ma çalakîya xo ra fek vera nêdanî.”
Ma dewlete ra domananê xo wazenî
Fatma Okka (43) zî dîyar kerde ke lajê ci Burhan Okka (24) 3 serrî yo tepişte yo û va: “3 serrî yo ke cayo ke ma muracat nêkerdo nêmendo. Ma tu cewabêk nêgirewte. Piştî dîyeno keyeyanê Amedî. Ma zî dayîk î. Ferq dekeweno mabenê dayîkan. Ma zî sey her dayîkan domananê xo da dewlete. Cok ra ma dewlete ra domananê xo wazenî.” STENBOL
