Keyeyê Zulkuf Gezenî ke seba şermizarkerdişê tecrîdê serê Rayebrê PKKyî Abdullah Ocalanî zindanê Tekîrdagî de cuya xo peynî kerd, şî zîyaretê Leyla Guvene. Guvene dayîk Havva Gezene verik kerde û va: “Xoverdayîşê fadayî yê Mazlûm Doganî, badê 40 serran şexsê hemra Zulkuf Gezenî de pê ame. Hemra Zulkufî, Mazlûm Dogano nikayîn o.”
Keyeyê Zulkuf Gezenî ke seba şermizarkerdişê tecrîdê serê Rayebrê PKKyî Abdullah Ocalanî zindanê Tekîrdagî de cuya xo peynî kerd, şî zîyaretê Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke 133 rojî yo grevê vêşanîye yê bêdem û anêgêrayîşî de ya. Dayîk Havva Gezen, pî Şehmûz Gezen û Ahmet Gezenî wexto ke kewtî ode hêsirî çimanê Leyla Guven û Şêhmûz Gezenî ra ameyî war. Dima ra Leyla Guvene bi hetkarîya kênaya xo ronişt û dayîk Havva Gezene verik kerde bermaye.
Guvene keyeyê Gezenî rê serweşî waşte û va: “Ez zindan ra yena. Hîssê zindanî zaf cîya yî. Seba ke moralê hemrayê zindanan xurt bo, ez hawayêko zêde xover dana. Mi nêzanayêne Zulkuf do no barê giran bigîro. Zulkuf ez qurbanê to biba. Cayo ke tedeyî cennet bo. To xoverdayîş û cuya Mazlûm Doganî weçîna. Xoverdayîşê fadayî yê Mazlûm Doganî, badê 40 serran şexsê hemra Zulkuf Gezenî de pê ame. Hemra Zulkufî, Mazlûm Dogano nikayîn o.”
Guvene destê dayîk Havva Gezene tepişte û va: “Zerrîya to vêşaye, wa zerrîya sewbîna dayîkan nêvêşa.” AMED
