Serekê Pêroyî yê CHPyî Kemal Kiliçdaroglu derheqê tayînkerdişê qayûman yê şaredarîyanê HDPyî de va: “Problemê problemê HDPyî nîyo û partîyêka sîyasî yo. Qayûm bêhurmetîya îradeya şarî yo.”
Serekê Pêroyî yê CHPyî Kemal Kiliçdaroglu nuştoxê rojnameyê Sozcuyî rê qisey kerd û reaksîyon nîşan da qerarê Wezîrîya Karê Zerre yê herinda hemşaredaranê bajaranê girdan yê Amed, Mêrdîn û Wanî de tayînkerdişê qayûman. Kiliçdaroglu dîyar kerd ke çîyo ke ameyo kerdene goreyê demokrasî nîyo û wina dewam kerd: “Gamêka bi ruhê darbe ameyo kerdene ya. Derbe dayî îradeya şarî ro. Weçînayîş ra ver YSK namzedîya înan qebûl kerdo. Labelê ewro rojnameyê hetgiran înan sey sucdar îlan kenî. Kamî wext ra nata vîşêrê dadgehan sucdar yenî îlankerdene. Her cayê dinya de muhakeme qerar dano.”
Kiliçdarogluyî tewr peynî bale ant vindetişê sîyasî yê AKPyî ser û wina va: “Her çiqas ke pêroyê dadgehan destê înan de bî zî paweyê qerarê dadgehan nêvindenî û bi hawayêko lez û bez gam erzenî. Problemê problemê HDPyî nîyo û partîyêka sîyasî yo. Qayûm bêhurmetîya îradeya şarî yo. Ma wexto ke Davutoglu serewezîrî ra ardî war û şaredaranê xo dayî îstîfakerdene zî eynî vindetişî nîşan da. Eke şima wina bikerî, qey şonî sindoqan ser. Eke şima sindoqan ronî, ganî şima hurmet zî nîşanê îradeya şarî bidî. Bi nê kerdişan ma tu cayê dinya de nêeşkenî vajî Tirkîye de demokrasî esto.” ANQARA
