Navenda Nûçeyan
Hevseroka Partiya Çep a alman Katja Kîppîng bi daxuyaniyekê êrişên giran ên dewleta tirk ên li ser HDP’ê şermezar kir. Kîppîng bi bîr xist ku di rojên dawî de bi sedan HDP’î hatin binçavkirin û ji bo rakirina mafê destnedana parlamenteriyê yê 9 wekîlên HDP’î fezleke ji meclisê re hatin şandin û xwest ku ev zext tavilê bi dawî bibin.
Hevseroka Partiya Çep bang li Wezîrê Karên Derve Heîko Maas kir û jê xwest ku bi gotinên aşkera zext û êrişên li Tirkiyeyê yên li ser wekîlên hilbijartî, şermezar bike. Hevserokat Partiya Çep got, “Divê mafên demokratîk ên bingehîn ên li Tirkiyeyê yên ji aliyê serokkomarê dewleta tirk Erdogan ve tên binpêkirin, neyên paşguhkirin.”
Kîppîng anî ziman ku fatûreya sererastkirina têkiliyên navbera hikûmeta Alman a Federal û Erdogan timî li muxalefeta li Tirkiyeyê tê birîn û got, “Her ku têkiliya bi Erdogan re sererast dibe, zextên li Tirkiyeyê li dijî muxalefeta demokratîk jî zêde dibe. Ev jî tê wateya hevkariya sûcê Almanyayê ya di vê mijarê de.”
Hevseroka Partiya Çep Kîppîng her wiha bêdengî û helwesta Partiya Sosyal Demokrat (SPD) a hevparê hikumeta Merkel jî rexne kir û got, “Divê ji hikumeta federal bê pirsîn; gelo hûn nirxên mafên mirovan û demokrasiyê li gorî hesabê berjewendiyan dinirxînin?”
