Wekîlê DEPî yê Mêrdînî Mehmet Sîncar seba ke cînayetanê faîl-î meçhulan ser o cigêrayîş bikero şibi Êlih la 4ê êlula 1993yî de îdarekarê DEPî yê Êlihî Metîn Ozdemîrî reyde amebi qetilkerdene. Tugayê Qesasî yê Tirkan no kiştiş girewtbi xo milî. Wezîranê dewlete yê ê çaxî Necmettîn Cevherî û Mehmet Gokhanî vatbi ke kiştoxî tepişîyayê la Wezîrê Karanê Zereyî yê ê çaxî Mehmet Gazîogluyî zî vatbi ke kiştoxî nêtepişîyayê.
Rixmê xîretanê keyeyê Sîncarî, partîyan û rêxistinan zî derheqê qetilkerdişî de tehqîqatêko xurt nêame kerdene û dewa nêameye akerdene.
1996 de Qezayê Susurlukî ra dima tay serebûtê tarîyî roşnî bîyî. Şêwirmendê Serekwezîrîye yê ê çaxî Kutlu Savaşî raporê xo yê serê Qezayê Susurlukî de pare kerd ke cînayetê Sîncarî hetê Mahmut Yildirim (Yeşîl), îtîrafker Alaattîn Kanat, Îsmaîl Yeşîlmen û Mesut Mehmetogluyî ra ameyo plankerdene. Kutluyî nê agahîyî îfadeyanê tepişte Muhsîn Gulî ra arê dabî.
28ê çeleyê 2000î de Beykoz de lîderê Hîzbullahî Huseyîn Velîoglu şerê vera polîsan de kişîyabi û keyeyê ci yê Beykozî de xeylêk belgeyî ameyî vistene bi destî. Belgeyan de ameyêne vatene ke Mehmet Sîncar hetê tetîkkeş Cîhan Yildizî (Huseyîn) ra ameyo qetilkerdene. Cîhan Yildiz 15ê tebaxa 2008î de Avusturya ra teslîmê Tirkîya ame kerdene. Yildiz cînayetê Sîncarî zî tede 6 cînayetan û 2 serebûtanê birîndarkerdişî ra ame muhakemekerdene. Cîhan Yildizî rê 26ê nîsana 2013î de ‘halê holî’ ra cezaya muabede ameye dayene. Îtîrazê kiştox Yildizî ser o 2019 de reyna dewa ameye akerdene. Cîhan Yildizî îdîa kerd ke ey cînayetêk nêkerdo û teyna dersê wendişê Quranî dayêne.
Tetîkkeşê Hîzbullahî Cîhan Yildiz Êlihî ra bi rayîrê SEGBÎSî tewrê roniştişanê dewa beno. La dewaya serê cînayetê Mehmet Sîncarî 4ê êlula 2023yî de raştê wextvîyartişî yena.
Avûkatanê keyeyê Sîncarî ra Şaneşîne Aydin derheqê babete de ANFyî rê qisey kerd.
Şaneşîne Aydin da zanayene ke dewaya vera Cîhan Yildizî wextvîyartişî ra do nêkewa la dewaya serê cînayetê Sîncarî do bikewa. Şaneşîne Aydin pare kerd ke keye û avûkatanê Sîncarî waşt ke wa pêro kiştoxê Sîncarî bêrê muhakemekerdene la no waştiş ameyo redkerdene. Şaneşîne vat: ”Derheqê raporanê Susurlukî û îtîrafanê Hîzbullahî de tehqîqatêk nêame kerdene. Cînayetê Sîncarî teyna pê muhakemekerdişê Cîhan Yildizî nêno roşnîkerdene. Teyna muhakemekerdişê kesêkî sereyê na dewa yeno girewtene û kiştoxê raştikênî pawîyenê.
Mehkemeya Cezaya Girane ya Amedî de versûcê Hîzbullahî dosyayêka bîne ra yenê muhakemekerdene. Seba ke 4ê êlula 2023yî de prosesê wextvîyartişî qedîyeno ganî muhakemekerdişêko xurt bêro kerdene. Cînayetî 30 serrî xo pey de verdayo. Mîyanê nê 30 serran de kiştoxê esasî ameyî pawitene ke dewa bikewa verê wextvîyartişî.”
