Navenda Nûçeyan |
Komelgeha Jinên Azad a Rojhilatê Kurdistanê (KJAR) bi daxuyaniyek li dijî kuştina jin û jîngehê kampanyayek da destpêkirin.
Di daxuyaniyê de KJAR’ê diyar kir ku sala 2021’an ji bo jinan û jîngehê salek gelek dijwar bû û wiha got: “Ev êrîş li Kurdistanê hem di asta desthilatê hem jî ji aliyê dagirkerên Kurdistanê ve bi awayekî sîstematîk tên meşandin.”
KJAR’ê da zanîn ku li rojhilatê Kurdistanê û Îranê rojane jin tên kuştin, daristan tên şewitandin û pêşiya robarên avê tên girtin û got ku ji ber van kiryarên rejimê karesatên mezin ên xwezayî û mirovî çêbûne.
Di daxuyaniyê de hat diyarkirin ku sala borî hem li rojhilatê Kurdistan, Belûcistan, Loristan û gelek deverên din ên cuda yên Îranê kuştinên jinan û xerakirina jîngehê bi rêjeyek berbiçav zêde bûne.
Di dawiya daxuyaniya KJAR’ê de wiha hat gotin: “Em kampanyek bi dirûşma ‘Li dijî kuştina jin û jîngehê têbikoşîn’ radigihînin. Çi erkek bikeve ser milê me em amade ne, bi cih bînin. Bi vê mebestê em bang li gelê kurd ê li rojhilatê Kurdistanê bi taybetî jinan dikin, tevlibûnek xurt ji vê kampanyê re bikin û li dijî hişmendiya dixwaze jin û jîngehê tune bike, em têbikoşin.”
