Koordînasyonê KJKyî bi eşkerayîyêka nuştekîye vera hêrişanê vera cinîyan hêrsê xo ard ziwan û nê pare kerdî:
”Bado ke çalakîyanê 8ê Adare de cinîyan bi aktîvîteyan tewri û têkoşînê xo fîna çiman ver camêrd-dewlete-hemkaran ê kurdan destê xo da yewbînan û vera destkewteyanê cinîyan hêrişî zêdînayî. Sey elemananê Suleyman Soyluyî yo ke aktoro verên ê şerê taybetî û qirkerdiş û şerê vera kurdan û kişxotê kurdan o, hêrişê destkewteyanê cinîyan kenê. Seke yeno zanaye Suleyman Soyluyî eşkera vatbi ke têkoşînê kurdan de rolê cinîyan gird o û ganî bêrê hedefgirewtene. Eşkera yo ke nê hêrişê ke sîstemê hemserekîye û temsîlê secîyeyî hedef genê bi waştişê dişmenanê kurdan û cinîyan yenê kerdene. Nê hêrişê ke xeylêk wexto bi hewayêkê sîstematîkî yenê kerdene, na serra peyêne de dahîna bîyî sîstematîk û yew merkezî ra yenê rayraberdene. Nê merkezî de AKP-MHP, Hudapar û PDK ca genê.
Bi hezaran cinîyê aktîvîstî yê kurdî û sîyasetmedarî ameyî destbendkerdene, tepiştene û zîndanan de sey esîrî yenê tepiştene. Zîndanî bîyî pirr, serşinê. Rixmê heme zextan sere de cinîyî xoxerdayoxê zîndanan têkoşîn kenê. 8ê Adare de cinîyî reyna raştê hêrişê wezîfedaranê dewelete ameyî û ameyî destbendkerdene. Bi nê destbendkerdişan ke hetê merkezanê şerê taybetî ra yenê kerdene, wazenê verê cinîyan bigêrê. Eynî wextî de vera cinîyan ê sîyasetmedaran polîtîkaya linçkerdişî rayra benê. Heta hêrişanê fîzîkî û psîkolojîk kenê. Destkewteyê sey temsîlîyê secîyeyî, hemserekîye û newera musayîş û şuxulnayîşê ziwanê dayîke bi gan û gonîya bi hezaran cinîyan ameyî destfînayene. Bi kede û bedelanê girdan ameyî destfînayene. Nê erjî wina lez nînê fedakerdene. Sebebê ci çi beno wa bibo vera nê destkewteyan ganî çew ziwanê xo derg mekerê û babeta menfeat û xirsê xo yê şexsî mekero. Êyê ke muneqeşeyanê winayênan rayra benê ganî cade nînan caverdê û biewnê karê xo ra. Kurdê welatperwerê ke wazenê nê warî de bigurîye ganî vera polîtîkaya dişmenî hîşyar bê û kayana mexapîyê. Rojdemê kurdan pawitiş û xurtkerdişê destkeweyanê ci yo.
Dişmen ziwan û kulturê kurdan înkar keno, hêrişê ci keno, çîn hesibneno û asîmîle keno. Êyê ke sefanê dişmenî de ca genê, paştî danê ci ûca ra sîyasetmedaranê kurdan hedef genê. Sefanê dişmenî ra hedefgirewtişê sîyasetmedaranê kurdan ê cinîyan eşkera polîtîkaya dişmenî ya û çîyo winayên nîno qebulkerdene. Waştişê nê hêrişan oyo ke destkewteyanê cinîyan û kurdan bikerê zehîf heta destê xo ci rê bikerê derg. Ma vînenê ke vera nê hêrişan tewiro xurt nîno mojnayene. Ganî cinîyê kurdan û tirkan vera nê hêrişanê şerê taybetî tewiro xurt ramojnê. Reyna vera destbendkerdiş û tepişnayîşan zî ganî tewir bigêrîyo. Eke ma verê nê hêrişan megerê, qirkerdişê cinîyan ke her roje qewimîyenê do zafêr bibê. Reyna ma veng danê camêrdan zî, ê ke paştî têkoşînê cinîyan ganî vera nê hêrişanê qirkerdişî vengê xo vejê. Cinîyî sey vizêrî ewro zî do bibê pawitoxê kultur, ziwanê dayîke û cuyeya azade.”
